«Kazgıdromet» mamandary 25 sáýirde elimizdiń birneshe iri qalasynda meteorologııalyq jaǵdaıdyń qolaısyz bolatynyn habarlady. Aýada zııandy zattardyń jınalýyna baılanysty turǵyndardyń densaýlyǵyna qaýip tónýi múmkin, dep habarlaıdy Egemen.kz.
Sınoptıkterdiń boljamynsha, qolaısyz meteorologııalyq jaǵdaılar kelesi qalalarda kútiledi:
Almaty, О́skemen, Semeı, Rıdder jáne Balqash. Qaraǵandy men Temirtaýda jaǵdaı ásirese túnde kúrdelene túspek.Mundaı jaǵdaı – jel, tuman nemese temperatýralyq ınversııa kezinde týyndaıdy. Bul ýaqytta óndiris oryndary men kólikterden shyqqan zııandy zattar aýaǵa tarap ketpeı, jer betine jaqyn qabatta jınalyp qalady.
Aýanyń lastanýy, ásirese, tynys alý joldary, júrek-qan tamyrlary aýrýlary men allergııasy bar jandarǵa tikeleı áser etedi. Osyǵan baılanysty meteorologtar mynadaı keńester beredi:
1. Dalada serýendeý ýaqytyn shekteý;
2. Ashyq aýada fızıkalyq jattyǵýlar jasamaý;
3. Avtomagıstraldar men óndiristik nysandardan alys júrý;
4. Sozylmaly aýrýy bar adamdarǵa qajetti dári-dármegin janynda ustaý.
Eske sala keteıik, búgin elimizdiń ońtústik óńirlerinde aptap ystyq kútilse, soltústik pen batys aımaqtarda jańbyr jaýyp, naızaǵaı oınaıdy.