Qasym jyrlaǵan qala halyqaralyq baıqaý jeńimpazy

Oralym, meniń, Oralym Respýblıkamyzdyń batystaǵy qaq­pasy Oral bes jyldan beri As­tanalar men iri qalalar ha­lyq­aralyq assambleıasynyń múshesi. Mundaı yn­tymaqtastyq qalalar arasyndaǵy qa­rym-qatynastar men ózara ynty­maqtastyqty damytýǵa jańa serpin bergeni de ámbege aıan. Ár jyl saıyn osyndaı baılanystar men tájirıbeler aıasynda, halyqaralyq assambleıaǵa múshe qalalar arasynda baıqaýlar men konkýrstar ótkizilip keledi. О́tken aptada Astanalar men iri qalalar halyqaralyq assambleıasy osyn­daı kezekti halyqaralyq konkýrstyń nátıjelerin jarııa etti. Bul jóninde atalmysh assambleıanyń atqarýshy dırektory V.I.Selıvanovtyń Oral qalasynyń ákimi S.H.Orazovqa joldaǵan qatynas hatynda bylaı dep kórsetilgen: «TMD-nyń jáne Eýrazııalyq ekonomıkalyq odaqtyń úzdik qalasy» taqyrybyndaǵy halyqaralyq baıqaý konkýrstyń qorytyndysy boıynsha Oral qalasy úzdikter qatarynan kórindi. Atap aıtqanda Oral qalasy «Qalany abattandyrýǵa keshendik kózqaras» nomınasııasy boıynsha jeńimpaz dep tanyldy. Biz osy jaǵymdy jańalyqqa baılanysty Oral qalasynyń ákimi Samıǵolla Orazovpen shuǵyl baılanysqa shyqqan edik. – Álemdegi qalalardyń búgingi damý praktıkasynda abattandyrý isi jetekshi mánge ıe. Qaýqıtyp kóp qabatty úıler turǵyza salý asa qıyn sharýa emes. Mundaı soraıǵan jalań ǵımarattar adamnyń eńsesin basyp turǵandaı áser etedi. Bir sózben aıtqanda abattandyrý uǵymyn – sol bıik ǵımarattardyń janyndaǵy demalys oryndary, gúlzarlar men saıabaqtar, sýburqaqtar, ashyq keńistikter dep túsinýge bolady. Sońǵy jyldary biz qala qurylysyn jalań júrgizbeı máseleniń osy jaǵyna da úlken kóńil bólýdi ádetke aınaldyrdyq. Tipti, eski qonystardaǵy burynǵy saıabaqtardy jańǵyrtýǵa baǵyt ustadyq. Halyqaralyq konkýrsta jeńimpaz atanýymyz osyndaı isterdiń bir nátıjesi bolsa kerek. Iá, qala basshysy oryndy atap kórsetkendeı Oralda sońǵy jyldary qolǵa alynǵan ońdy ister jeterlik. Tek bıylǵy jyly munda otyzǵa tarta gúlzarlar men demalys oryndaryn qaıtadan jańǵyrtý belgilenip otyr. Oral qalasynyń ákimi Orazov ony táýelsizdiktiń jıyrma jyldyǵyna tartý dep esepteıdi. Temir QUSAIYN, Oral