Albanııanyń astanasy – Tıranada kúres túrlerinen Muhamet Malo memorıalynda ótip jatyr. Birikken kúres áleminiń (UWW) baǵdarlamasyna engen reıtıngtik týrnırde Qazaqstannyń balýandary da baq synady, dep habarlaıdy Egemen.kz.
Jarysty erkin kúres sheberleri bastady. Alash topyraǵynan attanǵan 13 balýannyń arasynan alǵashqy kúni Bolat Saqaevtyń ǵana jeńis tuǵyryna kóterilýge kúsh-jigeri jetti. 86 kg salmaq dárejesinde kúsh synasqan 33 jastaǵy saqa sportshy alǵashqy aınalymdarda Eýropa birinshiliginiń qola júldegeri, túrkııalyq Osman Gıochen men álem chempıonatynyń kúmis jáne qola júldegeri, slovakııalyq Borıs Makoevtan basym tústi. Jartylaı fınalda Saqaev byltyr Zagrebte tórtkúl dúnıeniń teńdessizi dep tanylǵan grekııalyq Iorgos Kýıýmsıdıske ese jiberdi. Al qola medal úshin tartysta Bolat jastar arasyndaǵy álem chempıony (U20), túrikmenstandyq Alp Arslan Begendjovtan aılasyn asyrdy.
Rızabek Aıtmuhan erkin kúresten Bishkektegi halyqaralyq týrnırde baq synaıdy
Kelesi kúni 97 kg salmaqta synǵa túsken Rızabek Aıtmuhanǵa aıryqsha senim arttyq. Bastapqy básekelerde grýzııalyq Andro Margıshvılı, úndistandyq Vıkkı Vıkkı jáne ıtalııalyq Benjamın Honısti esh qınalmaı utqan qazaqtyń áıgili balýany jartylaı fınalda Olımpıadanyń eki, álemniń alty jáne Eýropanyń tórt dúrkin chempıony, reseılik Abdýlrashıd Sadýlaevpen jolyqty. Bul aıqas «orys tankisiniń» aıqyn jeńisimen aıaqtaldy. Al qola medal úshin básekede Rızabek nebary 23 sekýndta úndistandyq Djoıntı Kýmardyń tas-talqanyn shyǵardy.
Tıranada 92 kg salmaqtaǵy álem chempıonatynyń qola júldegeri, Azııanyń úsh dúrkin chempıony, ırandyq Ámir Hosseın Fırýzpýr elimizdiń eki birdeı beldi balýany Azamat Dáýletbekov pen Kamıl Kýrýglıevtiń jolyn bógedi. Qos jerlesimiz úshinshi oryn úshin ózara kúsh synasyp, bul beldesýde Azamattyń asyǵy alshysynan tústi. Sóıtip, elimizdiń erkin kúres sheberleri Albanııadaǵy jarysty úsh qolamen qorytyndylady.
Dál sol mejeden kórinýge taǵy úsh sportshymyzdyń zor múmkindigi boldy. Alaıda olar sheshýshi sátte súrindi. Atap aıtsaq, Mereı Bazarbaev (61 kg) albanııalyq Zelımhan Abakarovqa, Maıs Álıev (70 kg) reseılik Ibragım Ibragımovqa jáne Nursultan Azov (125 kg) polshalyq Kamıl Koschıolekke jol berip, besinshi oryndy qanaǵat tutty.
Erkin kúresten ótken jarystyń jeńimpazdary:
57 kg – Spenser Rıchard Lı (AQSh); 61 kg – Zaýr Ýgýev (Reseı); 65 kg – Sýjet Sýjet (Úndistan); 70 kg – Ernazar Akmatalıev (Qyrǵyzstan); 74 kg – Iýnes Emamı (Iran); 79 kg – Mohammad Nahodı (Iran); 86 kg – Ibragım Kadıev (Reseı); 92 kg – Ámir Hosseın Fırýzpýr (Iran); 97 kg – Abdýlrashıd Sadýlaev (Reseı); 125 kg – Meıson Parrız (AQSh).Áıelder kúresinen ótken jarysty qazaq qyzdary óte qarqyndy bastady. 50 kg salmaqtaǵy Zeınep Baıanova Kedra Roza Rııandy (AQSh), jastar arasyndaǵy álem chempıony Mııa Nakamýrany (Japonııa) jáne jasópirimder arasyndaǵy álem birinshiliginiń jeńimpazy Mýskan Mýskandy (Úndistan) esh kúmánsiz jeńdi. Odan keıin Úndistannyń taǵy bir beldi balýany Prııanshı Prajaratty 13:2 esebimen eseńgiretken Zeınep altynnan alqa taqty.
Áıelder kúresinen el quramasynyń bas bapkeri aýysty
Komandalyq áriptesiniń jeńisti jolyn 55 kg salmaq dárejesinde synǵa túsken Laýra Álmaǵambetova jalǵastyrdy. Pýshpa Pýshpa (Úndistan), Anastasııý Blaıvas (Germanııa) jáne Lılııa Malanchýkty (Ýkraına) tize búktirgen ol da altyn tuǵyrdan qol bulǵady.