Zańǵar taýlar alystaǵan saıyn bıikteı túsedi. Qazaqtyń kemeńger uly, kesteli tilmen órnektegen ómirsheń shyǵarmalaryn álem moıyndaǵan talantty jazýshy, belgili qoǵam qaıratkeri Ábish Kekilbaev álemi de ómir kóshi ilgerilegen saıyn saǵynta túseri, ańsaýly oıǵa jeteleı túseri sózsiz. Mine, osyndaı saǵynyshtan týǵan taǵy bir taǵylymdy kesh Aqtóbe gýmanıtarlyq kolledjinde ótti.
El tarıhynda aıryqsha orny bar kórnekti memleket jáne qoǵam qaıratkeri, sarabdal saıasatker, Qazaqstannyń halyq jazýshysy, Eńbek Eri Ábish Kekilbaevtyń ómiri men shyǵarmashylyǵyna arnalǵan «Ǵulama tulǵa, ǵıbratty ǵumyr» atty ádebı-tanymdyq keshti oblystyq tilderdi damytý basqarmasy men osy kolledj ujymy Qazaqstan halqynyń tilderi kúni men el Táýelsizdiginiń 25 jyldyǵyna oraı birlese uıymdastyrdy. Sharaǵa zııaly qaýym ókilderi, kolledjdiń oqytýshylyq quramy men stýdentter qatysty. Keshtiń maqsaty barlyq ómirin táýelsiz memleketimizdiń qalyptasýy men rýhanı damýyna arnaǵan Ábish Kekilbaevty eske alý, ónegeli ómiri men ónerin jas urpaqqa úlgi etý bolyp tabylady.
Ádebı keshtiń shymyldyǵyn M.Ospanov atyndaǵy Batys Qazaqstan memlekettik medısına ýnıversıtetiniń oqytýshysy, aıtysker aqyn Juldyz Qojabekova týma talantqa arnaǵan tolǵaýymen ashty. Shara barysynda «Abyz aǵa. Ábish aǵa» atty derekti fılm kórsetildi.
Kezdesýde sóz alǵan belgili qoǵam qaıratkeri, fılosofııa ǵylymdarynyń doktory Amangeldi Aıtaly talantty tulǵa týraly tushymdy áńgime órbitti. О́zi Parlament Senatynyń depýtaty bolǵan kezde Ábish Kekilbaevtyń Parlament Májilisiniń depýtaty retinde til máselesine qatysty kúreskerlik qasıeti aıqyn kóringenin tilge tıek ete kelip, jazýshylyq sheberligi men azamattyq adamgershiligin aıtyp berdi. Aqyn, kósemsózshi, «Shamshyraq – Aqtóbe» JShS dırektory Meıirhan Aqdáýletuly jastarǵa ana tilin ardaqtaý, qurmetteý kerektigin jetkizdi. Ol Ábish Kekilbaevtyń belgili qoǵam qaıratkeri, talantty jazýshy bola tura, óte kishipeıil, adamgershiligi mol adam bolǵanyn aıta kelip, «Ábish týraly aıtý da kerek, eń durysy Ábish shyǵarmalaryn oqý qajet. Bul senderdiń ultjandy azamat bolyp qalyptasýlaryń úshin óte-móte qajet», – dep túıindedi sózin.
Keshte gýmanıtarlyq kolledjdiń shyǵarmashyl jastary Ábish Kekilbaevtyń óleńderi men kósemsózderinen úzindiler oqyp, «Úrker», «Eleń-alań» romandarynan teatrlandyrylǵan qoıylym kórsetti. Kolledj kitaphanasy men S.Jıenbaev atyndaǵy oblystyq jasóspirimder kitaphanasy birigip, Ábish Kekilbaev shyǵarmashylyǵynan kitap kórmesin uıymdastyrdy.
Satybaldy SÁÝIRBAI,
«Egemen Qazaqstan»
Aqtóbe