Qazaqstan Respýblıkasy men Reseı Federasııasynyń XIII óńiraralyq yntymaqtastyq forýmy aıasynda «Qazaqstan Respýblıkasy men Reseı Federasııasy arasyndaǵy týrızmdi damytýdyń jańa múmkindikteri» taqyrybynda paneldik sessııa ótti, dep habarlaıdy «Egemen Qazaqstan» tilshisi.
Sessııa barysynda taraptar týrıstik naryqty damytý salasyndaǵy ıdeıalar jáne jetistikter jaıly pikir almasyp, eýrazııalyq keńistiktegi yqpaldastyq úderisterin jandandyrýdaǵy eki eldiń osy saladaǵy ózara baılanysy men múmkindikterin talqylady.
Qazaqstandyq tarap halyqaralyq «EKSPO-2017» mamandandyrylyǵan kórmesi men Astana qalasy jáne Mańǵystaý oblysynyń týrıstik áleýetin tanystyrdy.
Sessııa jumysyn ashqan elimizdiń «Atameken» Ulttyq kásipkerler palatasy Basqarma tóraǵasynyń orynbasary Iýlııa Iаkýpbaeva qazaqstandyq týrızm salasyn damytý jáne Qazaqstan men Reseı Federasııasy arasynda osy salany órkendetýdegi joǵary múmkindikter jaıyna toqtaldy. «Biz kózdep otyrǵan máseleler – olar jol men kólik qoljetimdiligi, qonaq úılerdiń, ásirese óńirlerdegi qonaq úıler qyzmetiniń sapasy, kórikti oryndardy aqparattyq jaǵynan qoldaý. Bul máseleler eki el úshin de ózekti dep oılaımyn. Bizdiń týrıstik saladaǵy yntymaqtastyǵymyzdyń áleýeti qýatty. Aldaǵy ýaqytta transshekaralyq baǵdarlar tetigin jasaýǵa, turaqty avıareıster men temir jol qatynasy aýqymyn keńeıtý men charterlik reısterdi iske qosý arqyly kólik qoljetimdiligin arttyrýǵa daıynbyz», dedi ol.
Sonymen qatar, Iý.Iаkýpbaeva qazirgi tańda eki eldiń aldynda týrónimderdiń sapasyn kóterý, týrkompanııalar men qonaq úılerdiń, tamaqtaný oryndarynyń, áýe tasymaldaýshylarynyń, kólik kompanııalarynyń kúshin biriktirý mindetteri turǵanyn atap ótti.
Láıla EDILQYZY