Elordada general Saǵadat Nurmaǵambetov atyndaǵy «Jas Ulan» respýblıkalyq áskerı mektebine jańadan qabyldanǵan 10-synyp ulandarynyń saltanatty túrde ant qabyldaý rásimi ótti.
Áskerı kıimderi boılaryna jarasqan, symdaı tartylǵan 62 ulan sap túzep, arnaıy ázirlengen keń zalǵa endi.
Ortaǵa kók baıraǵymyz ákelinip, ile Ánuran shyrqalǵannan keıin ulandardyń ant qabyldaý rásimi bastaldy. Aty-jónderi atalǵan sátte saptan alǵa nyq basyp shyǵyp, ant mátinin mánerlep oqyǵan jas óskinderdiń senimdi de ashyq daýysy qulaqqa jaǵymdy estiledi, júregińe jyly tıedi.
Jıyn barysynda áskerı mektep basshysy, polkovnık Muhtar Maıkeevpen az-kem suhbattasýǵa múmkindik boldy. Bizdiń qoıǵan saýalymyzǵa oraı mektep basshysy: «Memleket basshysynyń bastamasymen qurylǵan, 1999 jyldyń 4 qarashasynda resmı túrde ashylǵan «Jas Ulan» respýblıkalyq áskerı mektebi – elimizdiń Qarýly Kúshteri salasyna qyzmet etýdi maqsat etken jetkinshekterdi tárbıeleýde ózindik orny bar bilim oshaǵy. Táýelsiz Qazaqstannyń Qarýly Kúshteri úshin áskerı qyzmetkerlerdi mektep qabyrǵasynan daıyndaý isine Elbasy Nursultan Nazarbaevtyń aıryqsha kóńil bólip kele jatqanynyń arqasynda bul áskerı mektep jaqsy jaqtarymen kórinip keledi. Qurylǵaly bergi 17 jyldyń ishinde 700-den astam jas túlekti tárbıelep shyǵarǵan mekteptiń tusaýyn Elbasynyń ózi keskeni, sondaı-aq, bilim uıasyna Keńes Odaǵynyń Batyry, Halyq Qaharmany, qazaq halqynyń aty ańyzǵa aınalǵan perzenti, Táýelsiz Qazaqstannyń tuńǵysh Qorǵanys mınıstri, armııa generaly Saǵadat Nurmaǵambetov esiminiń berilýi bizdiń ujymǵa úlken jaýapkershilik júkteıdi. Mine, ózderińiz kýá bolyp otyrǵandaı, mektebimizge bıyl qabyldanǵan 62 oqýshy ant qabyldaý ústinde. Bul sharanyń mańyzy óte zor. О́ıtkeni, shákirtterimiz osy ant qabyldaý arqyly ózderiniń asa jaýapty joldy tańdaǵandaryn tereń sezine túsedi, – dedi.
Odan ári polkovnık M.Maıkeev 2015 jyldan bastap qabyldaý erejesine ózgertýler engizilip, mektepke 10-synyptan bastap oqýshylar qabyldanatynyn, mektep Jarǵysyna sáıkes áskerı pánder jáne kúsheıtilgen dene daıyndyǵy, memlekettik jáne shet tilderi tereńdetilip oqytylatynyn, munda 420 tárbıelenýshige bilim berý qarastyrylǵanyn atap ótti. Sonymen birge, ol mektepti bitirýshilerdiń 80 paıyzy Qazaqstan Respýblıkasy Qorǵanys mınıstrliginiń, Reseı, Belarýs, Túrkııa memleketteriniń joǵary áskerı oqý oryndarynda bilim alyp jatqanyn jetkizdi. Onyń sózine qaraǵanda, qazirgi tańda mektepte elimizdiń 14 oblysynan, Astana, Almaty qalalarynan kelgen tárbıelenýshiler, 14 ulttyń ókilderi bilim alýda. Mektepte tárbıelenýshilerdiń quramynda jetim balalar, qamqorlyqqa alynǵan óskinder, kóp balaly otbasynyń perzentteri, ata-analary múgedek jetkinshekter, áskerı qyzmetshilerdiń balalary bar. Bular tárbıelenýshilerdiń jalpy sanynyń 50 paıyzyn quraıdy eken.
Ant qabyldaý rásimi aıaqtalǵan soń Qorǵanys mınıstrliginiń ókilderi, ardagerler, ustazdar men ata-analar sóz sóılep, jas ulandarǵa tabys tilep, aq tilekterin arnady. О́z kezeginde ant qabyldaǵan jas órender de Qorǵanys mınıstrliginiń basshylyǵy men ustazdaryna alǵystaryn bildirip, Táýelsiz Qazaqstannyń jas Otan qorǵaýshylary retinde talap údesinen shyǵatyndaryna senim bildiredi.
Budan keıin oqýǵa jańadan qabyldanǵan 4-oqý-rotasy ulandarynan quralǵan kórkemónerpazdar toby kelgen qonaqtar men ata-analarǵa arnap konserttik baǵdarlama usyndy. Sońynda arnaıy shaqyrylǵan qonaqtar men ata-analar mekteptiń jalpy jaǵdaıymen tanysty.
Joldybaı BAZAR,
«Egemen Qazaqstan»
Astana
Sýretterdi túsirgen
Orynbaı BALMURAT