Oqyrman ...qýanyshyn bólisedi
Tájikstanda «Shymkent» shaǵyn aýdany boı kóterdi
Bıyl burynǵy odaqtas respýblıkalardyń, qazirgi egemen elderdiń barlyǵynda derlik mereıtoıly jyl. Osy oraıda Qazaqstannyń Tájikstandaǵy elshiligi Ońtústik Qazaqstan oblysynyń ákimdigimen birlesip, Dýshanbe jáne Hodjent qalalarynda birqatar resmı, mádenı jáne saltanatty is-sharalar ótkizdi. Sonyń biri – tamyz aıynyń sońynda Tájikstandaǵy bizdiń elshilik osy eldiń Soǵdı oblysy, Hodjent qalasynyń basshylyǵymen kelissózder ótkizip, bıznes ókilderiniń iskerlik kezdesýlerin uıymdastyrdy. Tájik aǵaıyndar bizdiń elimizge degen dostyǵy men qurmetiniń belgisi retinde Hodjent qalasynda jańadan boı kótergen shaǵyn aýdan bóligine «Shymkent» ataýyn berip, onyń ashylý rásimi shyn nıetti kóterińki kóńil kúıde ótkizildi. Osylaısha, Shymkent-Hodjent qalalarynyń baýyrlastyq mártebesi burynǵydan da bekı túskendiginiń kýási boldyq. Hodjenttegi berekeli kezdesýler aıaqtalǵan soń Dýshanbede S.Aını atyndaǵy Memlekettik opera jáne balet teatrynda OQO óner sheberleriniń saltanatty konserti joǵary deńgeıde ótip, jergilikti halyqtyń qoshemetine bólendi. Muhtar KÁRIBAI, Dýshanbe ...qoldaý kútedi
Esenjanov esimi laıyqty
Elimizde óskeleń urpaqqa úlgi-ónege bolar tulǵalar jetkilikti. Solardyń biri – Hamza Esenjanov desek, qatelespeıtin shyǵarmyz. Onyń «Aqjaıyq» trılogııasy ádebıetsúıer qaýymǵa jaqsy tanys. Jaıyq jurtshylyǵy kórnekti jazýshynyń týǵanyna júz jyl tolý merekesin osydan jeti-segiz jyl buryn laıyqty túrde atap ótti. Sol kezde oblys ortalyǵyndaǵy balalar men jasóspirimder kitaphanasyna atalǵan jazýshynyń esimin berý jóninde usynys-tilekter aıtylǵan bolatyn. Halyqtyń bul tilegi qoǵamdyq uıymdarǵa jetkizildi. Obaly ne kerek, jergilikti basqarý organdary da buǵan túsinistikpen qarady. Osylaısha 2014 jyly respýblıkalyq onomastıkalyq komıssııa Batys Qazaqstan oblystyq balalar men jasóspirimder kitaphanasyna Hamza Esenjanovtyń esimin berý jóninde tıisti sheshim de shyǵarǵan edi. Alaıda, keıingi jyldary onomastıka salasynda bolǵan moratorıılerge baılanysty máseleniń túbegeıli sheshimin tabýy tejelip tur. Búgingi tańda moratorıı alynǵany belgili. Sondyqtan osy máseleniń zańdy-quqyqtyq mártebesin negizdeýde Úkimet tarapynan qoldaý kútemiz. Altynbek ÁBDILMANOV, Batys Qazaqstan oblystyq «Qazaq tili» qoǵamynyń tóraǵasy Oral ...súısinis bildiredi
Boıtumar bolar ulaǵatty sóz
Til jóninde nebir asyl sózder bar. Uly tulǵalarymyz Abaı, Maǵjan, Muhtar Áýezovten tartyp, óz zamanynda ardaqty azamattarymyzdyń ult tiliniń qadir-qasıetin ósıet etip jazyp ketkenin ardaq tutamyz. Al myna ulty basqa Asyly Osman apaıymyz qazaq tiliniń qadirin taıǵa tańba basqandaı etip aıta bilipti. «Qazaq degen jan-jaǵyna qamqorshy bolyp júretin halyq qoı, ol kezinde artta qalǵandy alǵa jetelep, jalańash qalǵandy kıindirdi, ash qalǵannyń qarnyn toıdyrdy, endi búgin biz nege sol qazaqtyń tiliniń damýy úshin sen, men dep bólinbeı túgel qaýym bolyp jumylmaımyz? Osyǵan qanshalyqty aqyl keregin túsinbeımin. Qazaqtyń nany tátti de, tili jaman ba?! Olaı emes, qazaqtyń nanyn jegen adam, tilin de úırensin!»... Budan artyq ulaǵattyń keregi joq. Men sııaqty ómir tabaldyryǵyn endi attamaq urpaq bul qanatty sózdi boıtumar etip taǵyp alsaq artyqtyq etpeıdi. Zamanbek MUHAMETHANOV, D.Babaev atyndaǵy 115-mekteptiń 11 synyp oqýshysy Almaty ...jańalyǵyn jetkizedi
Jibek jip ıiretin seh ashyldy
Shymkenttik jeke kásipker Orazkúl Búkirova jibek qurtyn ósirýdi qolǵa alyp, osylaısha úzilip qalǵan úrdisti qaıta jandandyrmaq. Kezinde Saıram aýdanynda tabysy kóp osy kásippen biraz azamattar aınalysyp, ony óndiretin ortalyq bolmaǵan soń is aıaqsyz qalǵan edi. Jibek jip ıiretin sehy bar áıel endi bul bastamany sońyna deıin jetkizem dep otyr. Tipti, mata jáne kilem toqýdy qolǵa almaq. Sátin salsa, jibek matadan tigilgen sándi otandyq ónimdi kıetin kún de alys emes. Qolynan is keletin kásipker aldymen jibek qurttary japyraǵyn jeıtin tut aǵashyn kóptep egip, arnaıy plantasııa jasapty. Qazirdiń ózinde 21 gektar jerge tuqymbaq ázirlep úlgergen. Kóshetti keıin sol jerden alyp kóbeıte bermek, ári oblystyń aýa raıy da qurttyń bul túrin ósirýge óte qolaıly. «Jibek dúnıe júzinde óte qadirlenedi, ony bilesizder. Jibekten jasalǵan matalar, jibekten jasalǵan buıymdar kóp jerde qoldanylady. Jibek talshyq qorǵanysta, medısına salasynda paıdalanylady», – deıdi kásipker Orazkúl Búkirova. Aman BOLSYNOV Shymkent ...tilegin jetkizedi
«Qamqor» ortalyǵy ashyldy
Elbasy arnaýly áleýmettik qyzmetterdiń balamaly úlgisimen jumys isteýdi tapsyrǵan bolatyn. Kúni búginge deıin osy baǵytta arnaýly qyzmet kórsetýge jeke sektorlardy tartý jumysy júrýde. Osy oraıda 3 qazan kúni aýdan ortalyǵynda aýdandyq jumyspen qamtý jáne áleýmettik baǵdarlamalar bóliminiń uıymdastyrýymen «Qaztalov» qoǵamdyq uıymymen kelisimshartqa otyryp, múmkindigi shekteýli balalar men 18 jastan asqan psıh-nevrologııalyq aýrýy bar múgedekterge qyzmet kórsetetin «Qamqor» ortalyǵy ashyldy. Ortalyqta 18 jasqa deıin jáne 18 jastan asqan adamdarǵa arnalǵan eki kabınet jumys jasaıdy. Ortalyq qyzmet alýshylarǵa kúndizgi jartylaı stasıonarlyq túrde 4 saǵattyq qyzmet túri kórsetiledi. Arnaıy mamandar men áleýmettik qyzmetkerler jumys jasaıtyn ortalyqta jumys kestesine saı arnaýly 8 túrli áleýmettik qyzmet kórsetý jolǵa qoıylǵan. Qaırat JAQYP Batys Qazaqstan oblysy, Qaztalov aýdany