Qazirgi ýaqytta ártúrli zamanaýı baspa quraldarynyń progressıvti damýyna baılanysty jalǵan aqsha jasaý faktileri de jıi oryn alýda. Taıaý kúnderi Almaty qalalyq memlekettik kirister departamentiniń ekonomıkalyq qylmystarǵa qarsy kúres júrgizý salasynyń qyzmetkerleri jalǵan aqsha jasaý faktisine baılanysty taǵy bir qylmystyq áreketti áshkereledi.
Operatıvti izdeý sharalary barysynda Almaty qalasynyń «Dýman» shaǵyn aýdanynyń Qyzyljar kóshesinde memlekettik nómiri 664 KNA 02 «Nissan Ceiro» avtokóligi kúdikti jaǵdaıda toqtatyldy. Kólikti tintý barysynda ishinen nomınaly 2000 teńgelik 46 dana jalǵan aqsha tabyldy.
«Avtokólik ishinde otyrǵan Qazaqstan azamattary B.S.Baımoldın men I.V.Moıkınniń turǵylyqty jerleri boıynsha júrgizilgen tintý jumystary kezinde kompıýter, Qazaqstan Respýblıkasy Ulttyq bankiniń 359 dana 2000 teńgelik jalǵan banknottary, A4 formatyna shyǵarýǵa daıyndap qoıǵan 2000 teńgelik 90 dana aqsha nusqalary, basqa da jalǵan aqsha jasaıtyn qaǵaz qıyndylary tabyldy. Atalmysh fakti boıynsha Qazaqstan Respýblıkasy Qylmystyq Kodeksiniń 231 babynyń 2 tarmaǵy boıynsha qylmystyq is qozǵalyp, Almaly aýdandyq sotynyń qaraýyna tapsyryldy» Almaty qalalyq memlekettik kirister departamentiniń túsindirý jumystary basqarmasynyń bólim basshysy Beken Nurahmetov.
Quqyq qorǵaý qyzmetkerleriniń aıtýynsha, alaıaqtar saýda-sattyq kezinde jalǵan aqshany nomınaly birdeı naǵyz banknottardyń ishine qosyp beredi. Mundaıda satýshy kóp jaǵdaıda jalǵan aqshany taza nomınaldan ajyrata almaı qalady. Keıinnena jalǵan aqsha anyqtalǵanmen, ony kimderdiń qolynan alǵanyn ajyratý qıynǵa soǵady. Mundaı áreketter negizinen taýar aınalymy damylsyz júretin saýda oryndarynda jıi oryn alady.
Sondyqtan da qylmystyń atalmysh túrine qarsy kúrestegi eń birinshi qorǵanysh – árkimniń ózindik saqtyq sharalary deıdi mamandar. Alaıaqtyqqa qarsy kúres qoǵamdyq sıpat alǵanda ǵana ońdy nátıje bereri sózsiz. Sonymen qatar, jalǵan aqshamen alaıaqtarǵa aldanyp qalǵan jaǵdaıda, shuǵyl túrde tıisti quqyq qorǵaý organdaryna habarlaýdy esten shyǵarmaǵan abzal. Sebebi, jedel habarlanǵan qylmysty izin sýytpaı áshkereleýdiń múkindigi mol.
Aınash ESALI,
«Egemen Qazaqstan».