Shymkent qalasynda aqparattyq júıege eshbir qatysy joq qarjy bóliminiń burynǵy qyzmetkeri jabyq júıege emin-erkin kirip, jer ýchaskeleri týraly málimetterdi ózgertken. Al Aqmola oblysynda ár jyldary jumystan shyǵyp ketken 83 qyzmetkerdiń aqparattyq júıege kirý quqyǵy der kezinde joıylmaǵan, dep habarlaıdy QazAqparat tilshisi «Azamattarǵa arnalǵan úkimet» memlekettik korporasııasynyń baspasóz qyzmetine silteme jasap.
Atalǵan zań buzýshylyqtar aǵymdaǵy jyly «Azamatttarǵa arnalǵan úkimet» memlekettik korporasııasyna engen «Jer kadastry ǵylymı-óndiristik ortalyǵy» RMK-synyń qyzmeti boıynsha anyqtalyp otyr. «Qazirgi kezde osy jumys barlyq oblystyq jer kadastry jáne jyljymaıtyn múlikti tehnıkalyq tekserý departamentterinde júrip jatyr. Atalǵan sharalar qarasha aıyna deıin jalǵasady», - deıdi «Azamattarǵa arnalǵan úkimet» memlekettik korporasııasy jer kadastry jáne jyljymaıtyn múlikti tehnıkalyq tekserý dıreksııasynyń (JMTT JK) dırektory Baqyt Ábishev.
Máselen, Ońtústik Qazaqstan oblysynda jer týraly málimetterdi zańsyz ózgertý jáne aqparattyq qaýipsizdik erejelerin saqtamaý áreketteri áshkerelendi. Shymkent qalasynda aqparattyq júıege eshbir qatysy joq qarjy bóliminiń burynǵy qyzmetkeri jabyq júıege emin-erkin kirip, 14 jer ýchaskesi týraly málimetterdi ózgertken. Sóıtip, málimetter bazasynda kadastrlyq negizi joq jer ýchaskeleri enip ketken. Osy ispetti zańsyz áreketter Aqmola men Almaty oblystarynda da anyqtaldy. Qazirgi kezde atalǵan faktiler boıynsha barlyq materıaldar quzyrly memlekettik organdarǵa jiberildi. Sol jerde tıisti sharalar qolǵa alynady.