Soltústik Qazaqstan oblysy el Táýelsizdiginiń 25 jyldyǵyna mańyzdy ekonomıkalyq jetistiktermen jetti. Oblystyń Astanadaǵy kúnderine oraı Ortalyq kommýnıkasııalar qyzmetinde ótken brıfıngte aımaq ákiminiń birinshi orynbasary Aıdarbek Saparov osylaı dedi.
Baspasóz máslıhatynda A.Saparov oblystyń tynys-tirshiligine qatysty mańyzdy málimetterdi ortaǵa saldy. Onyń aıtýynsha, óńirlik jalpy ónim kólemi 25 jyl ishinde 13 esege artyp, 837 mıllıard teńgege jetken.
– О́ńirlik jalpy ónim jan basyna shaqqanda 20 esege artyp, 1 mıllıon 700 teńgeni qurady. Negizgi kapıtalǵa quıylǵan ınvestısııa 34 esege kóbeıip, 2015 jyly 155 mıllıard teńgege jetti. О́ndiristik ónim kólemi 1991 jyly 7 mıllıon teńge bolsa, byltyr 167 mıllıard teńge boldy. Aýyl sharýashylyǵy keshenindegi eńbek ónimdiligi jan basyna shaqqanda 1 mıllıon 666 myń teńgege jetti. Qazirgi tańda agrarlyq sektorda aldyńǵy qatarly tehnıkalar qoldanylady, sharýashylyqqa jańa tıimdi tehnologııalar engizilýde. Sonyń arqasynda ónim kólemi de ulǵaıyp kele jatyr, – dedi oblys ákiminiń birinshi orynbasary.
25 jyldyń ishinde óńirde shaǵyn jáne orta bıznestiń úlesi eselep artqan. Osy kezeńde 3 300 myń sharshy metr turǵyn úı paıdalanýǵa berilipti. Qurylys jumystarynyń kólemi toqsanynshy jyldarmen salystyrǵanda 40 esege ulǵaıǵan.
Táýelsizdik jyldarynda oblystyń mádenı-rýhanı tynys-tirshiligine de qan júgirip, aýyz toltyryp aıtarlyqtaı jumystar atqaryldy. Atap aıtar bolsaq, respýblıkalyq mańyzy bar 600 tarıhı jáne mádenı eskertkish memleket qorǵaýyna alynypty. A.Saparov aıtpaqshy, «qulaıyn dep turǵan klýbtar men kitaphanalarǵa, mýzeılerge» kúrdeli jóndeý jasalǵan. Bıyl oblys ortalyǵyndaǵy Qazaq sazdy drama teatrynyń eski ǵımaratyn beıimdeý arqyly, 500 oryndyq kórermen zalynyń tujyrymdamasy ázirlenipti. Jaqyn arada jobalyq-smetalyq qujattary daıyn bolatyn jobanyń qurylysy aldaǵy jyldyń basynda bastalýǵa tıis.
Qalyptasqan dástúr boıynsha, «Qýatty óńir – qýatty Qazaqstan» aksııasynyń aıasynda oblys delegasııasy 22 qazan kúni Beıbitshilik jáne kelisim saraıynda «Maǵjan elinen – elorda tórine» atty gala-konsert ótkizbek. Sonymen qatar, osy kúni «Han Shatyr» saýda oıyn-saýyq ortalyǵynyń aldyndaǵy alańda «О́ńir berekesi» atty aýylsharýashylyq taýarlarynyń jármeńkesi ashylady. Oblys ákiminiń birinshi orynbasary aıtyp ótkendeı, Qyzyljardan 700 tonna azyq-túlik tıegen kólikter kerýeni qazir Astanaǵa jetipti. Eki kúnge sozylatyn jármeńkede 700 tonnaǵa tarta azyq-túlik satylymǵa shyǵarylady. Atap aıtar bolsaq, 90 tonna mal eti, 10 tonna shujyq ónimderi, 24 tonna sút pen sút ónimderi, 450 tonna kókónis jáne basqa da taýarlar sórege qoıylmaq. Jármeńke úshin Qyzyljar óńiriniń 100-den astam sharýashylyq pen óńdeýshi kásiporyndary ónimderin jóneltipti.
Arnur ASQAR,
«Egemen Qazaqstan»