Oqyrman
...jańalyǵyn jetkizedi
Tigin fırmasy ashyldy
Munaıly aýdanyna qarasty Basqudyq aýyly kún sanap kórkeıip, aýyl kóleminde kásipkerlik qanatyn keńge jaıyp keledi. 30 myńǵa jýyq turǵyny bar aýylda 165 shaǵyn kásip ıeleri turaqty jumys jasap, aýyl turǵyndaryn jumyspen qamtyp otyr. Olardyń qatary endi tigin fırmasymen tolyqty. Qazaqy oıý-órnekpen bezendirilgen kórpe-tósek, qorjyn men ydys-aıaq qaptary, quraq jastyqtar daıyndaıtyn tigin fırmasy 12 adamdy jumyspen qamtydy.
«Bıznestiń jol kartasy-2020» baǵdarlamasy aıasynda nesıe alyp memle-kettiń qoldaýyna ıe bolyp otyrǵan tigin fırmasy zamanaýı tehnologııamen jabdyqtalǵan. Qural-jabdyqtar arnaıy tapsyryspen shetelderden alynǵan. Aıyna 20-25 qyz jasaýyn daıyndaıtyn fırma aldaǵy ýaqytta memlekettik tapsyrys negizinde jumys isteýge de nıetti.
– 2011 jyly jeke kásipkerlikpen aınalysýǵa bet buryp, kásibimdi ashtym. Basqudyq aýyldyq okrýginen satyp alǵan jerge ǵımarat turǵyzdym, ishine zamanaýı tigin qural-jabdyqtaryn satyp aldym. Búgingi tańda ózimizdiń oblysymyzdan bólek Atyraý, Aqtóbe oblystarynan tapsyrys berýshilerimiz bar. Aldaǵy ýaqytta Aqtóbe, Qulsary qalalarynan ózimizdiń ortalyqtarymyzdy ashýdy josparlap otyrmyz, – dedi tigin fırmasynyń dırektory Baıan Abdýllaeva.
Venera MIRLAN
Mańǵystaý oblysy
...ótinishin bildiredi
Úlgi eterlerimiz qaıda?
Almatydaǵy Abylaı han men Áıteke bı kósheleriniń qıylysynda shaǵyn ǵana baq bar. Bul jer jurt úshin burynnan aptap ystyqta boı tasalap, balalaryn oınatatyn alań. О́kinishke qaraı, jasyl-jelek aıasynda júrgen búldirshinder túgil eresek ul-qyzdar da osynda uzaq jyldardan beri myzǵymaı turǵan tastarǵa tomsyraıa qaraıdy. Sebebi, «tilden aıyrylǵan» tastardaǵy jazýlar olar úshin túsiniksiz. Aıtalyq, bir tasta: «Bul jerde Qazaqstan tyń ıgerýshilerdiń qurmetine monýment ornatylatyn bolady» dep jazylsa, kútimsiz qalǵan ekinshi tasta: «1918 jyldyń 3 martyna qaraǵan túnde bolshevıkterdiń basshylyǵymen Vernyı qalasynda (qazirgi Almaty qalasy) Sovet ókimeti jarııalandy. Osy jerde revolıýsııalyq soǵys komıtetiniń úıi ornalasqan bolatyn» degen jazý bar.
Eki tasqa da telmirgen kez kelgen bala qalyń oıdyń qushaǵynda qalady. О́ıtkeni, tyń túgil traktordy da kórmegen qala balasyna tyń týraly túsindirip kór. Ekinshi tastyń tarıhyn aıtyp berý úshin, eń aldymen, ótken ǵasyrǵa sholý jasaý kerek... Al osy mańda tas tuǵyrǵa ornatylǵan monýmentter týraly da únsiz qalýǵa bolmaıdy. Qazaqstanda Keńes ókimetin ornatýǵa atsalysqan revolıýsıonerlerdiń qatarynan M.Frýnze, D.Fýrmanov, V.Kýıbyshev sekildi kósemderdi kóresiz de, taǵy da oıǵa qalasyz. Olardyń ornynda áý basta-aq azattyqty ańsaǵan Alashtyń ardaqtylary nege turmaıdy? Qazaqtyń qadirli urpaǵyn jastarǵa úlgi eter eskertkishter nege qoıylmaıdy?
D.JOLDASBEK
ALMATY
...usynys jasaıdy
Atqa miný bizge unady
Atqa jaıdaq minýdiń paıdasy mol ekenin tıisti ádebıetten oqyp bilgenmin. Jylqymen jaı aıańdaǵannyń ózinde oǵan mingen adamnyń aǵzasynda túrli terbelis týady eken. Iаǵnı, barlyq býyn qozǵalysqa kóship, munyń ózi aǵzaǵa oń yqpal etedi dep jazylypty men oqyǵan kitapta. «Býyndaryń áli qatqan joq. Sondyqtan senderge atqa miný óte paıdaly», degen bolatyn deneshynyqtyrý páninen beretin ustazymyz.
Sonymen birge, ol kisi medısına tilinde ıppoterapııa dep atalatyn em túri de bar ekenin aıtyp bergen edi. Aýdanymyzda osy ıppoterapııa tásili jolǵa qoıyla bastapty. Sonyń basty bir mysaly, Kóshankól aýylyndaǵy «Alaý» jazǵy lagerindegi demalǵan bizder úsh saǵatqa jýyq ýaqytty attyń ústinde ótkizgen edik. Salt minip, serýendep qaıtqannan keıin bizder budan alǵan alǵashqy áserlerimizben bólisken bolatynbyz.
Atqa otyrý bizge keremet unap, boıymyzǵa qosymsha kúsh qosylǵandaı boldy. Aýylǵa barǵan soń atqa salt minýdi ádetke aınaldyrdyq.
Dıas QALIOLLIN,
Taldyapan orta mektebiniń oqýshysy
Batys Qazaqstan oblysy,
Qaztalov aýdany
...másele kóteredi
Otandyq telehıkaıalar qajet
Qazaq kórermeni qashanǵy sheteldik telehıkaıa keıipkerleri úshin kúıip-pisip, bógde mádenıettiń jyrymen jubanady? Keıingi ýaqytta otandyq telearnalar efırin tolyqtaı jaýlaǵan sol telehıkaıalarǵa sanasyn sarǵaıtqany sonshalyq, elimizdiń jasy da, kárisi de úndiniń, túrik pen káristiń salt-sanasyn, mádenı qundylyqtaryn óziniń tól mádenıetinen, ulttyq salt-dástúri men ádet-ǵurpynan áldeqaıda tereń biletindeı halge jetti. Budan shyǵatyn bir jol – kórermen kóńilinen shyqqan sol shetel serıaldarymen tereze teńestire alatyndaı ulttyq dúnıelerdi túsirý. Eń bastysy, qazaqqa jaqyn taqyryptarǵa qurylatyn hıkaıalardy túsirýge kóńil bólgen abzal.
Shyndap kelgende, meksıkalyq, brazılııalyq atyshýly serıaldarǵa ózek bolyp otyrǵan mahabbat pen zulymdyqtyń, dostyq pen qastyqtyń, ádilet pen ádiletsizdiktiń, jalpy, aq pen qaranyń, jaqsylyq pen jamandyqtyń taıtalasyn óz qoǵamymyzdan-aq kúnine san márte kórip, bilip júrmiz. Demek, ynta-yqylas bolǵan jaǵdaıda osy jaıttardyń bárin óz mádenıetimizge, dástúrimiz ben ulttyq qundylyqtarymyzǵa oraılastyryp, qazaqy mazmundaǵy taǵylymdy dúnıe túsirýge ábden bolady. Ári-beriden soń ulttyq mádenıetti damytýǵa árqaısymyz mindettimiz. Qazir irgemizdegi elderdiń bári de sheteldik teleserıaldardy ózderiniń ishki ónimderimen almastyrýǵa barynsha kúsh salyp jatyr. Munyń barlyǵy – syrttan bolatyn rýhanı ekspansııaǵa tosqaýyl qoıýǵa tyrysýshylyqtan týyndaǵan áreketter.
Maqsat ORALBEK
Ońtústik Qazaqstan oblysy