Meksıkada atyshýly qylmystyq toptyń jetekshisiniń qazasynan keıin jappaı tártipsizdik bastaldy

Uzaq jyldar boıy «Jalısko jańa býyn karteli» qylmystyq uıymyna jetekshilik etken Osegera Meksıkadaǵy eń qatygez ári yqpaldy qylmyskerlerdiń biri retinde tanylǵan. Ol memlekettik qaýipsizdik kúshterimen ashyq qarýly qaqtyǵystarǵa túsýden taısalmaǵan. Atalǵan kartel negizinen kokaın, metamfetamın jáne fentanıl sııaqty esirtki zattaryn Amerıka Qurama Shtattaryna zańsyz tasymaldaýmen aınalysyp kelgen.   Amerıkalyq «The New York Times» basylymynyń málimetinshe, Osegera Halısko shtatyndaǵy Tapalpa qalasynda óltirilgen. Bul aımaq – qylmystyq toptyń irgesi qalanǵan ári basty tirek núktesi sanalatyn óńir. Meksıkanyń Vashıngtondaǵy elshiligi atalǵan arnaıy operasııany júrgizý barysynda AQSh tarapynan mańyzdy barlaý aqparattary usynylǵanyn resmı túrde rastady.  El boıynsha jappaı tártipsizdikter bastaldy

Osegeranyń qaza tabýy Meksıkanyń birneshe óńirinde jappaı tártipsizdikterge ulasty. Keminde bes shtatta, sonyń ishinde Halıskoda, kólikter órtelip, joldar ádeıi bógelgen. Bul jergilikti esirtki kartelderdiń bılikke qarsy jıi qoldanatyn taktıkasy.

Halısko shtatynyń gýbernatory Pablo Lemýs Navarro quqyq qorǵaý organdary men kartel músheleri arasynda qaqtyǵystar bolǵanyn rastady. Onyń aıtýynsha, belgisiz qarýly toptar arnaıy operasııaǵa kedergi jasaý úshin avtokólikterdi órtep, kóshelerdi japqan.

Shtatta tótenshe jaǵdaı rejımi engizildi. Keıbir aýdandarda qoǵamdyq kólik jumysy toqtatylyp, turǵyndarǵa úılerinen shyqpaýǵa keńes berildi. О́rt qoıý oqıǵalarynyń bir bóligi shtat astanasy –Gvadalahara qalasynda tirkelgen. Aıta keteıik, bul qalada aldaǵy aılarda fýtboldan álem chempıonatynyń oıyndary ótýi tıis edi.

Áýejaılar jabyldy, AQSh eskertý jasady

Pýerto-Valıarta halyqaralyq áýejaıy Gvadalahara halyqaralyq áýejaılary ýaqytsha reısterdi qabyldaýdy toqtatty. Áleýmettik jelilerde jolaýshylardyń áýejaı ǵımarattarynda jasyrynýǵa májbúr bolǵany túsirilgen beınejazbalar taralǵan.

AQSh memlekettik hatshysynyń orynbasary Krıstofer Landaý «El Menchonyń» qazasyn «Meksıka, AQSh, Latyn Amerıkasy jáne búkil álem úshin mańyzdy oqıǵa» dep atady.

Tártipsizdikterge baılanysty AQSh-tyń Meksıkadaǵy elshiligi Halısko, Tamaýlıpas, Mıchoakan, Gerrero jáne Nýevo-Leon shtattarynda júrgen amerıkalyq azamattarǵa qaýipsiz jerge panalap, syrtqa shyqpaýǵa keńes berdi.