Italııada ótken XXV qysqy Olımpıada short-trekshi Abzal Ájiǵalıevtiń sporttyq mansabyndaǵy tórtinshi olımpıada boldy. Jyldar boıy tórtjyldyqtyń basty básekesiniń irikteýlerinen irkilmeı ótip, el namysyn abyroımen qorǵap kele jatqan sportshy Mılanda 1000 metr, aralas estafeta jáne 500 metr qashyqtyqta baq synady, dep jazady Egemen.kz.
Abzal Ájiǵalıev XXV qysqy Olımpıada oıyndaryn qorytyndylap, osy joly jankúıerlerdiń qoldaýyn erekshe sezingenin jazdy. Sondaı-aq ol ózin fýtboldaǵy Marko Roısqa teńedi.
«Marko Roıs... Meniń súıikti Marko Roısym taǵy da chempıon atana almady». Bálkim, short-trektiń Marko Roısy men shyǵarmyn...
Men úshin bul tórtinshi Olımpıadam. Bıyl qoldaýdy erekshe sezindim: áleýmettik jelilerde jazylǵan jyly pikirlerdi kórdim, tún uıqysyn qıyp, tańǵa deıin otyryp jarystarymdy tamashalap, jankúıer bolǵandaryńyzdy bilemin. Sportshy úshin bul baǵa jetpes sezim. Barshańyzǵa shyn júrekten alǵys aıtamyn», dep jazdy ol.
Short-trekshi Denıs Nıkısha Olımpıadada 7-orynǵa turaqtady
Sondaı-aq short-trekshi Olımpıada jolynda qoldaý kórsetken jandarǵa alǵys aıtyp, aldaǵy ýaqytta da ózi óner kórsetetin sport túrin keńinen nasıhattaýǵa kúsh salatynyn jetkizdi.
«Men kóp jyldar boıy elimizdegi short-trektiń damýyna óz úlesimdi qosýǵa tyrystym. Aldaǵy ýaqytta da osy sportty Qazaqstanda keńinen nasıhattaı beremin. Bul meniń mıssııam ári júrek qalaýym. Bolashaqta elimiz osy sport túrinen eń myqty memleketterdiń qatarynda bolǵanyn qalaımyn. Osyǵan jetý úshin barymdy salamyn», dedi Abzal Ájiǵalıev.
Qysqy Olımpıada: Short-trekshi Abzal Ájiǵalıev pen Denıs Nıkısha shırek fınalǵa ótti
Sóz sońynda sportshy short-trekke degen qyzyǵýshylyq báseńdep qalmasa eken degen tilegin atap ótti.
«Sizderge degen kishkentaı ǵana ótinishim bar: kelesi Olımpıadaǵa deıin bizdiń sport jaıly umytyp ketpeńizder. Aldymyzda taǵy tórt jyl, kóptegen halyqaralyq jarystar bar. Bárine de qatysyp, el namysyn abyroımen qorǵaýǵa tyrysamyz. Komandamyzdy qoldap júrińizder. Olımpıadada kórgenderińizdeı, bul – óte qyzyqty ári tartysty sport túri», dep jazdy short-trekshi.
Olımpıada-2026: Short-trekshiler jarys jolynan shyǵyp qaldy