Úkimet farmasevtıka salasyndaǵy iri jobalardyń birine qoldaý kórsetti. Densaýlyq saqtaý mınıstrligi men «Hımfarm» AQ arasynda halyqty qoljetimdi dári-dármekpen qamtý jáne otandyq óndiristiń úlesin arttyrýǵa baǵyttalǵan ınvestısııalyq kelisim bekitildi. Qaýlyǵa Premer-mınıstr Oljas Bektenov qol qoıdy, dep jazady Egemen.kz.
Bul sheshim Shymkenttegi Polpharma Santo kásipornynda júzege asatyn iri jobanyń jańa kezeńin bastaýǵa jol ashty. Aldaǵy ýaqytta munda 300 jańa jumys orny qurylyp, salaǵa 39,5 mlrd teńge kóleminde jeke ınvestısııa tartylady. Onyń ishinde ǵylymı zertteýlerdi damytýǵa baǵyttalǵan qarajat ta bar. Jańa óndiristiń alǵashqy kezeńi 2029 jyldyń sońyna qaraı iske qosylmaq.
Elimizde qandaı dári-dármekter óndiriledi?
Joba aıasynda onkologııalyq, júrek-qan tamyr, ınfeksııalyq jáne sozylmaly aýrýlardy, sonyń ishinde týberkýlezdi emdeýge arnalǵan 38 túrli dárilik preparat óndiriledi. Barlyq ónim halyqaralyq sapa talaptaryna saı shyǵarylady.
Bastama otandyq óndirýshilerdiń úlesin kóbeıtip qana qoımaı, eldiń dárilik qaýipsizdigin nyǵaıtýǵa, farmasevtıka salasynda turaqty tehnologııalyq baza qalyptastyrýǵa múmkindik beredi. Halyq úshin dári-dármektiń qoljetimdiligi men sapasy da basty nazarda. Sonymen birge eksporttyq áleýetti arttyrý kózdelgen.
Eń iri bıofarmasevtıkalyq keshen salynady
Aıta keteıik, búginde farmasevtıkalyq ónimder óndirisi salasynda jalpy somasy 316,3 mlrd teńgeni quraıtyn 6 ınvestısııalyq kelisim jasalǵan. Bul baǵyttyń júıeli túrde damyp kele jatqanyn jáne Qazaqstanda dári-dármek óndirisin jergiliktendirýge berik negiz qalanǵanyn kórsetedi.
Farmasevtıkada otandyq óndirýshilerdiń úlesi qashan artady?