Italııada ótken 2026 jylǵy qysqy Olımpıada oıyndarynda Qazaqstan quramasy bir altyn medal jeńip aldy. Degenmen birqatar sportshymyz joǵary nátıje kórsetip, úzdik ondyqqa endi, dep habarlaıdy Egemen.kz.
Eske salaıyq, el qorjynyna jalǵyz júldeni mánerlep syrǵanaýshy Mıhaıl Shaıdorov salyp, Olımpıada chempıony atandy. Qazaqstan quramasynyń birneshe ókili óz jarystarynda alǵashqy ondyqqa kirdi. Olardyń keıbir jetistikteri tarıhı mańyzǵa ıe boldy.
Máselen, Ilıa Mızernyh táýelsiz Qazaqstan tarıhyndaǵy eń úzdik nátıjeni tirkedi. Shańǵymen úlken tuǵyrdan sekirýde ol segizinshi oryn alyp, osy sport túrindegi ulttyq rekordty jańartty.
Konkımen júgirýshi Nadejda Morozova 3000 metr qashyqtyqta altynshy bolyp márege jetti. Bul - 1998 jyly Lıýdmıla Prokasheva Olımpıadada qola medal alǵannan bergi eń joǵary nátıje. Sonymen qatar Morozova 5000 metrde toǵyzynshy, komandalyq iz kesý saıysynda segizinshi oryn ıelendi.
Onyń komandalasy Elızaveta Golýbeva da úsh ret úzdik ondyqqa endi. Ol 1500 metrde - jetinshi, 3000 metrde - onynshy oryn aldy. Golýbeva jáne Morozovamen birge komandalyq iz kesý saıysynda Arına Ilıashenko da segizinshi nátıje kórsetti.
Qazaqstandyq konkımen júgirýshi Evgenıı Koshkın 500 metr qashyqtyqta toǵyzynshy orynǵa turaqtady.
Short-trekshi Denıs Nıkısha 500 metr qashyqtyqta jetinshi oryn alyp, jekeleı saıystaǵy óziniń eń joǵary nátıjesine qol jetkizdi.
Frıstaıl-akrobatıkadan aralas komandalyq básekede Qazaqstan quramasy jetinshi boldy. Bul synda Asylhan Asan, Roman Ivanov jáne Aıana Joldas óner kórsetti. Aıta keteıik, erler arasynda Roman Ivanov 13-oryn alyp, ulttyq qurama tarıhyndaǵy úzdik nátıjeni jańartty.
Mogýlshy Anastasııa Gorodko da úzdik ondyqqa endi. Ol paralleldi mogýlda shırek fınalǵa deıin jetip, segizinshi oryn aldy. Osy dıssıplınada Pavel Kolmakov toǵyzynshy satyǵa jaıǵasty.
Mánerlep syrǵanaýdan áıelder arasynda Sofıa Samodelkına Qazaqstan tarıhynda eń joǵary nátıjeni tirkedi. Qysqa jáne erkin baǵdarlamanyń qorytyndysy boıynsha ol onynshy orynǵa turaqtady.
Jalpy, Mılan-Kortına-2026 Olımpıadasynda Qazaqstan atynan 36 sportshy 10 sport túrinde synǵa tústi.
Qysqy Olımpıadanyń saltanatty jabylý rásimin qaıdan kórýge bolady?