Sońǵy jyldary ulttyq qaýipsizdik, turaqtylyq pen tynyshtyq turǵysynda qazaqstandyq saıttardaǵy pikir jazatyn azamattardyń jaýapkershiligin arttyrý máselesi de jıi sóz bolýda. Dál osy másele «Qazaqstan Respýblıkasynyń keıbir zańnamalyq aktilerine aqparat jáne kommýnıkasııalar máseleleri boıynsha ózgerister men tolyqtyrýlar engizý týraly» zań jobasynyń tujyrymdamasy aıasynda anonımdi «jatyp-atarlardyń» pikirlerin barynsha azaıtý kózdelgen, dep xabarlaıdy QazAqparat tilshisi.
Qoldanystaǵy zańnamaǵa sáıkes, kez kelgen ınternet-resýrs buqaralyq aqparat quralyna jatady. Al oǵan jarııalanǵan aqparat sol BAQ-tyń ónimi bolyp sanalady. Sol sebepti ınternet-resýrstyń tutynýshylary jazǵan pikirler de, áleýmettik jeliler de qoǵamdyq sanany qalyptastyratyn quraldarǵa kiredi.
«Qazaqstanda árkim óz pikirin ashyq bildirýge quqyly. Alaıda, mundaı quqyq naqty bir adamǵa tıesili. Demek, onyń aty-jóni bolýy kerek. Al ondaı pikirler ınternet-resýrsta jarııalanyp, ǵalamtor paıdalanýshylary óz oılaryn ashyq bildirse, mundaı áreketter ınternet-resýrsty paıdalaný týraly kelisimde kórsetilýi shart. Atalǵan qujattar naqty zań normalaryna negizdelgen jón. Máselen, Azamattyq kodekstiń 15-baby, 1-2 tarmaǵyna sáıkes, Qazaqstan Respýblıkasynyń azamaty óz quqyqtary men mindettemelerin jeke atymen iske asyra alady. Budan bólek, 7-shi tarmaq boıynsha ózge bireýdiń atymen quqyqtar men mindettemelerdi oryndaýǵa bolmaıdy. Alaıda búrkenshek atqa ruqsat bar. Osyǵan baılanysty saıt paıdalanýshylarynyń óz aqparatyn jeke atymen, ıa bolmasa, búrkenshek atpen jarııalaý máselesin naqty erejemen retteýge qatysty usynystar bar», - dep túsindiredi tujyrymdamany ázirleýshi tarap.
Osy qujattyń aıasynda keıbir zańnamalyq aktilerge ózgerister men tolyqtyrýlar engizip, ınternet-resýrsy men ony paıdalanýshy azamat arasyndaǵy qarym-qatynasty naqty bir kelisimniń negizinde júrgizý kózdelgen.