Kommýnıster qulshyna kiristi

Qazaqstannyń Kommýnıstik halyq­tyq partııasynyń Aqmola oblystyq fılıaly qoǵam ómirindegi aıryqsha oqıǵa – Qazaqstan Respýblıkasynyń kezekten tys prezıdenttik saılaýyna zor qulshynyspen kirisip otyr. Mundaǵy ekpin túsiretin máseleniń biri QKHP 14 aqpandaǵy kezekten tys V sezinde Qazaqstan Respýblıkasynyń memleket basshy­ly­ǵynan úmitker retinde partııa OK hatshysy J.Ahmetbekovtiń usyny­lyp, onyń Ortalyq saılaý komıs­sııa­synda tirkelýi der edik. Jambyl Aý­januly Aqmola oblysyndaǵy Qor­ǵaljyn aýdanynyń týmasy. Biz saılaýaldy naýqanynyń bary­synan habardar bolý maqsatymen J.Ahmetbekovti qoldaý jónindegi oblys­tyq shtabqa kelgenimizde, partııanyń oblystyq fılıalynyń hatshysy Náı­la Samıgýlına Qazaqstan áıelderiniń sezinen oralǵan eken. – Meniń osynaý iri forýmǵa delegat bolyp saılanýymnyń ózi Táýelsiz memleketimizdegi demokratııalyq us­tyn­dardyń myqtylyǵyn dáleldeıdi, – dedi ol. – Elbasy N.Á.Nazarbaevtyń kezekten tys saılaý shaqyrý týraly sheshimi de bıylǵy mártebeli jyldyń abyroıyn arttyrady. Ortalyq komıtet hatshysy V.Kosarevtiń qatysýymen Kókshetaýda aýdandyq komıtet hatshy­larynyń, qala jurtshylyǵynyń jına­lysy ótkizilip, onda partııanyń saıası naý­qan kezindegi mindetteri túsin­di­rilip, kandıdatymyzdyń baǵdar­la­masy tanystyryldy. Erikti kó­mekshilerimizdiń qatysýymen úmit­­kerimizdiń paıdasyna 6200 qol jınaldy. Oblystyq jáne Zerendi, Býrabaı, Sandyqtaý, Atbasar, Aqkól, Jaqsy, Esil aýdandarynda shtabtar quryldy. Náıla Abdrahmanqyzynyń aıtýynsha, úgit sharasy barlyq aýdandar men qalalardy qamtıdy. Elimiz úshin eń ózekti taqyryp­tardy beıneleıtin nasıhattyq materıaldar kóptep jetkizilgen. Úgit­shiler olardy oblys ortaly­ǵy men eldi mekenderdiń kórneki jer­lerine ornalastyrýda. Par­tııa­nyń halyqqa úndeýleri de jurtshylyq nazarynda. Kókshetaý qalasynda aıshyqty bılbordtar paıda boldy. О́tken jumadan QKHP Aqmo­la oblystyq jáne Kókshetaý qa­lalyq fılıaly uıymdastyrǵan úgit brıgadasy oblys aımaq­ta­ry­na saparyn bastady. Ol úsh ke­zeń­dik kestemen júrgizilýde. Brıgada jetekshilerimen birge, ob­lysqa belgili azamattar par­tııa­nyń maqsat-múddelerin, prezıdenttikten úmit­kerdiń saı­laý­aldy baǵdarlamasyn túsindirse, tanymal ónerpazdar el ishin án men jyrǵa bólep júr. Baqbergen AMALBEK, Aqmola oblysy.