Áskerı doktrınany iske asyrý jaıy qaraldy

Parlament Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva bastaǵan osy komıtettiń músheleri elimizdiń Qorǵanys mınıstrliginde bolyp, Qazaqstan Respýblıkasynyń Áskerı doktrınasyn iske asyrý máselelerin talqylady, dep habarlady osy palatanyń baspasóz qyzmeti. Áskerı doktrınada elimizdiń Qarýly Kúshterin, áskerı qury­lym­dardy damy­tý­dyń keshendi sharalary belgilendi. Ol boıynsha Qarýly Kúshterdiń qury­lym­daryn ońtaılandyrýdy jáne jetil­dirýdi; onyń jaýyngerlik quramyn kúsheı­týdi; strategııalyq aralyq sıpattaǵy tolyq­qandy áskerı toptardy qurý kózdelgen. Sondaı-aq, bul shara basqa­rýdyń avtomatty júıesi men kom­mý­­nıkasııa quraldaryn engizý ese­binen áskerdi basqarý júıesin jetildirýdi; aqparattyq qaýipsiz­diktiń tıimdi júıesin qurýdy; áýe jáne zymyranǵa qarsy qorǵanys júıesin jetildirýdi; qazirgi zaman­ǵy qarý-jaraq jáne tehnıkamen, onyń ishinde dáldigi asa joǵa­ry qarýlarmen jabdyqtaý esebinen áskerlerdiń jaýyngerlik qabilet­tiligin arttyrýdy; áskerlerdiń jaýyngerlik daıyndyq júıesine qazirgi zamanǵy daıarlyq keshen­derin engizýdi; áskerı bilim berý jáne mamandar daıarlaý júıesin jańǵyrtýdy; memleket aýmaǵyn jáne Kaspıı aımaǵyndaǵy áskerı ınfra­qurylymdardy jedel jab­dy­q­taýdy jetildirýdi jáne basqa da mindetterdi qarastyrady. Áskerı doktrına aıasynda Qarý­ly Kúshterdi, basqa áskerlerdi jáne áskerı qurylymdardy keshen­di damytý týraly Qorǵanys mınıstri Sáken Jasuzaqov baıandady. Talqylaý barysynda Ulttyq ulannyń Bas qolbasshysy Rýslan Jaqsylyqov, Ulttyq qaýipsizdik komıteti tóraǵasynyń orynbasary – Shekara qyzmetiniń dırektory Dar­han Dilmanov, Ishki ister mınıstr­ligi Tótenshe jaǵdaılar jónin­degi komıtet tóraǵasynyń minde­tin atqarýshy Sábıt Bıtaev sóz sóı­ledi. Senatorlar Nurtaı Ábiqaev, Muhtar Altynbaev jáne Serik Jaqsybekov Áskerı doktrınany iske asyrýǵa, áskerı sala men qorǵanys týraly zańnamany jetil­dirýge qatysty birqatar mańyzdy máselelerdi kóterdi. Kezdesý qorytyndysy bo­ıyn­sha Darıǵa Nazarbaeva áskerı qyz­metkerlerdiń áleýmettik jaǵdaıyn, olardyń materıaldyq-tehnıkalyq jabdyqtalýyn jaqsartý jáne elimizdiń qorǵanys qabileti men qaýipsizdigin kúsheıtýge múmkindik beretin basqa da máselelerdi tal­qy­laý úshin múddeli memlekettik organ­darmen birlese jumys tobyn qurý­dy usyndy. Senattyń joǵaryda atalǵan komıteti elimiz Qarýly Kúshteriniń Qaraǵandy garnızonyndaǵy áýe qorǵanysy áskerı bólimine barýdy josparlap otyr.