Damır Ryspaev: "Barysqa" qaıta oralam

Astananyń «Barys» hokkeı klýbynyń burynǵy qorǵaýshysy Damır Rysbaevpen oıda joqta kezdesip qaldyq. Qazaqstannyń jastar qurama komandasynyń oıynshysyn Esil ózeniniń sol jaǵalaýynda oryn tepken eńseli ǵımarattardyń birinde áńgimege tarttyq. – Damır, ózińdi syrttaı jaqsy bilemiz. Hokkeı match­tarynda susty kóringenmen, jyly júzdi, sypaıy, qazaqtyń kádimgi sary balasy ekensiń. – Rahmet, aǵasy. – О́zińdi jaqsy bilemin dep jat­­qanym, oıyndaryńnan ǵa­na emes, muz aıdynyndaǵy tó­be­les­terińdi de aıtyp otyrmyn. – Ony men de sezip otyrmyn.  – Qazir qaıdasyń? – Astanada «Barystyń» «No­mad» degen farm-klýby bar. Sond­a oınap júrmin. – Onda barǵanyńa qansha boldy? – Biraz ýaqyt boldy. «Barys­tan» ketken soń sonda bardym. Qazir bári jaqsy. El qatarly oınap júrmin. – «El qatarly» degendi qa­laı túsinemiz? – «Barystyń» sapynda sońǵy 3 jylda shaıba salǵan emespin. Al «Nomadta» 19 match oınap, birneshe shaıba soq­­tym. – «Barys» týraly taǵy su­­raıyn. Sol komandada júr­ge­nińde tóbeles saǵan ne úshin kerek boldy? – Ne úshin degende, eger qarsy­lastarymyz dóreki oınap jatsa, oǵan shynyn aıtaıyn, shydamym jetpeıdi. Keıde bizdiń oıynshylar jaraqat alyp qalady. Sol kezde bir orynda tura almaısyń. – Arqam bar deısiń ǵoı. On­daı bolady. Qurlyqtyq hokkeı lıgasynda «Barys» pen «Kýnlýn Red Star» koman­da­larynyń oıynynda jalǵyz óziń biraz jigittiń «sazaıyn ber­genińdi» kórdik. Ol neden bas­taldy? – Qytaılyqtar bizdiń oıynshylardy jaraqattady, dóreki oınady. Soǵan shydaı almadym. – Álgi atoılap urys sal­ǵa­nyńdy Youtube-ta mıl­lıon­daǵan adam kóredi eken. Aıdyn­ǵa sol úshin de shyǵasyń ba? Shy­­­nyńdy aıtshy. – Qazaqstannyń jastar qura­masy sapynda shet elge shyqsam, meni jattyqtyrýshylar oıynǵa kóp jibermeıdi. Árıne, men ol úshin eshkimge renjimeımin. Olar komandanyń jaǵdaıyn oılaıdy. Biraq men jattyqtyrýshylardyń tapsyrmalaryn oryndap júremin. Esh jerde qateleskim kelmeıdi. Alaıda, bizdiń jigitterdi bireýler arandatyp jatsa, olarǵa qarsy dóreki oınasa, qarsylasty ornyna qoıýǵa týra keledi. – Hokkeıde jaǵa ustasqan jón emes dep eshkim aıtpaıdy. Ony naǵyz erlerdiń oıy­ny deı­di. Mysaly, Ulttyq hok­­keı lıgasynda oıynshylar qyrqy­syp jatady. Biraq olar­ǵa qatań jaza qoldanyla ber­meıdi. Al Qur­lyqtyq hokkeı lıgasynda jaǵdaı basqasha sııaq­ty... – Iá, durys aıtasyz. Hokkeı – erlerdiń oıyny. Biraq qazir ol názik oıynǵa aınalyp barady. Sol jaǵy ókinishti. Meniń «Barystan» ketýime «Kýnlýn Red Star» komandasymen kezde­sýdegi tóbelestiń kesiri tıdi. QHL-dyń tártiptik komıssııasy «Rysbaev lıgadan alastatylsyn» degen sheshim shyǵarypty. – Endi «Barysqa» qaıtyp kelý oıda bar ma? – Árıne, bar. Qudaı qalasa, «Barysqa» qaıta oralýǵa tıispin. Áńgimelesken Dastan KENJALIN, «Egemen Qazaqstan» ASTANA