Alty saǵat boıyna án áýeledi

Almatyda «Jyl tańdaýy» – úzdik ánder báıgesi márege jetti Keshe «Almaty-Arena» muz aıdynynda qorytyndylanǵan «Qazaqstan» teleradıokorporasııasynyń osynaý jobasy kóz aldymyzda júrgen óner maıtalmandarynyń egemendik jyldary bederindegi esebi boldy desek te bolady. Aıaqtalyp bara jatqan jyldyń eń úzdik ánderin anyqtaýdy maq­sat tutqan bıylǵy jobanyń aıyr­mashylyǵy – ol Táýelsizdiktiń 25 jyldyǵymen tuspa-tus kelip otyr. Sondyqtan mereıli sharaǵa úlken mán berilip, arnaıy saraptaý komıssııasy qurylyp, ıaǵnı 50-ge tarta adamnan turatyn qazylar alqasy 160 ánshiniń ishinen top jarǵan talanttardy tańdady. Alty saǵatqa sozylǵan televı­zııalyq túsirilim barysynda 65 ánshi sahnaǵa shyqty. Olardyń qatarynda sheteldik qonaqtar – Býraı men Qytaıdy baǵyndyrǵan qazaq ánshisi Araı da boldy. Roza Rymbaeva, Maqpal Júni­sova, Mádına Sádýaqasaova, Gúl­nur Orazymbetova syndy sahna sań­laqtary tyńdarmandaryn erek­she nómirlermen tolqytty. Mysaly, Rozanyń aspanda qalyq­tatyp án aıtýy, Aıqynnyń bıik­tikte salto jasaýy, sol sııaq­ty Býraıdyń Tóreǵalı Tóráli re­pertýaryndaǵy «Bir túrli qyz» ben Qaırat Nurtastyń «Baı­qa» ánin túrik tilinde náshine kel­tirip shyrqaýy shynynda da kórermenderge qýanysh syılady. Eń qyzyǵy, bastary daýǵa qalyp júrgen «Ninety One» to­by televızııalyq shoý rejıs­serleriniń talabyn oryndap, kos­tıým-shalbar, aq jeıdemen sahnaǵa shyqty. Ábden synǵa ushyraǵan top birinshi ret betterindegi boıaý­yn óshirip, syrǵalaryn sheship óner kórsetti. Osylaısha jastarymyz qazaq estradasynyń sahnasyn, aldyńǵy óner býynyn syılaıtyndaryn bildirdi. Joba júldelerdi oryndarǵa bólgen joq. Halyqtyń kóz aldynda júrgen 30 birdeı tanymal óner ıesi Táýelsizdiktiń 25 jyldyǵyna oraı júldeger atandy. Al Sara Tynyshtyǵulova, Eskendir Hasan­ǵalıev, Ramazan Stamǵazıev, Roza Rymbaeva, Maqpal Júnisova syn­dy sahna sańlaqtary ónerge sińir­gen eńbegi úshin bólek marapattaldy. KVN SPARTA komandasy arnaıy júldege ıe boldy. Erekshe oryndaýshylyǵymen kózge túsken jas ánshilerge «Jyl tańdaýy» altyn kýbogy tabystaldy. Shetelden kelgen qonaqtar – túrik ánshisi Býraı men Araı da ataýsyz qalmady. Aıtqandaı, Bý­raıdyń «Istersen» áni hıtke aınalyp, dúnıejúzi chattaryna engenin ánsúıer qaýym bilse kerek?! Esimi mýzyka áleminde 2004 jyly estil­genimen, ol ándi keıin aıta bas­taǵan. Alǵashynda túrik pop-mý­zykanttardyń ánderine aranjırovka jasaýmen aınalysqan Býraı búginde erekshe daýysymen, sulý ánimen mıllıondaǵan óleńsúıer qaýymnyń júregin jaýlady. Sondaı-aq, onlaın-daýys berý arqyly da tanymal úzdik ánderdiń «Jeńimpaz Kýbogy» ıelerin tapty. Al daýys jınaý 2 qarashadan bastalǵan. Kesh barysynda 2016 jyldyń tek úzdik ánderi shyrqalsyn degen maqsat bolǵan edi. Sahna tó­rinde saltanat qurǵan 65 ánshi bul talaptyń údesinen shyqty. «Qazaqstan» teleradıokorporasııasy «Jyl tańdaýy» ataýymen talaı mýzykalyq sharalar ótkizip júrse de, bul jolǵysy ózgeshe bolǵanyn atap ótý kerek. Eń bas­tysy, bul sońǵy shoý otandyq mamandardyń óz kúshimen ótkizildi. Tehnıkalyq jaǵynan da erekshe joba boldy. Keshti eki birdeı 2 PTS, 27 kamera túsirip jatty. Ánshilerdi aıtpaǵanda, shyǵar­mashylyq top ta, tehnıkalyq qyz­metkerler de qazaqstandyqtar boldy. Iаǵnı bul jobany endi to­lyqqandy ulttyq mýzykalyq shoý dep aıtýǵa qaqymyz bar. Jyldyń eń jarqyn jobasynda ónerpazdardyń barlyǵy ánderin tek jandy daýysta oryndady. El tarıhyndaǵy tuńǵysh ulttyq mýzykalyq báıgege kóńildi tapqyrlar klýbynyń komandalary da qatysty. Osylaısha, jýyrda ǵana paı­dalanýǵa berilgen «Almaty-Are­na» muz aıdyny 10 myńnan asa tyńdarmandy aıa­syna syıdyryp, áýelegen ánge bóledi. Aınash ESALI, «Egemen Qazaqstan» ALMATY