22 jeltoqsan 2010 jyl. Astana, Úkimet Úıi
Qazaqstan Respýblıkasynda terrorızmge qarsy is-qımyl salasyndaǵy qyzmetti uıymdastyrý qaǵıdasyn bekitý týraly
«Terrorızmge qarsy is-qımyl týraly» Qazaqstan Respýblıkasynyń 1999 jylǵy 13 shildedegi Zańynyń 4-baby 3-tarmaǵynyń 3) tarmaqshasyna sáıkes Qazaqstan Respýblıkasynyń Úkimeti QAÝLY ETEDI:
1. Qosa berilip otyrǵan Qazaqstan Respýblıkasynda terrorızmge qarsy is-qımyl salasyndaǵy qyzmetti uıymdastyrý qaǵıdasy bekitilsin.
2. Qazaqstan Respýblıkasy Úkimetiniń 2005 jylǵy 30 naýryzdaǵy № 284 QPÚ qaýlysynyń kúshi joıyldy dep tanylsyn.
3. Osy qaýly alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi.
Qazaqstan Respýblıkasynyń Premer-Mınıstri K. Másimov.
____________________
Qazaqstan Respýblıkasy Úkimetiniń 2010 jylǵy 22 jeltoqsandaǵy № 1404 qaýlysymen bekitilgen
Qazaqstan Respýblıkasynda terrorızmge qarsy is-qımyl salasyndaǵy qyzmetti uıymdastyrý qaǵıdasy
1-taraý. Jalpy erejeler
1. Osy Qazaqstan Respýblıkasynda terrorızmge qarsy is-qımyl jasaý salasyndaǵy qyzmetti uıymdastyrý qaǵıdasy (budan ári – Qaǵıda) «Terrorızmge qarsy is-qımyl týraly» Qazaqstan Respýblıkasy 1999 jylǵy 13 shildedegi Zańynyń 4-baby 3-tarmaǵynyń 3) tarmaqshasyna sáıkes ázirlengen.
2. Qaǵıda terrorızm saldaryn aldyn alýdy, jolyn kesýdi, ony barynsha azaıtýdy jáne (nemese) joıýdy uıymdastyrý tártibin anyqtaıdy.
Terrorızmdi anyqtaý, ashý jáne tergeý Qazaqstan Respýblıkasynyń Qylmystyq jáne Qylmystyq is júrgizý kodeksteriniń normalarynda, sondaı-aq óz quzyreti sheginde terrorızmge qarsy is-qımyldy júzege asyratyn memlekettik organdardyń vedomstvolyq normatıvtik quqyqtyq aktilerinde anyqtalady.
3. Qaǵıdada mynadaı uǵymdar paıdalanylady:
terrorızm aktisi - jarylys jasaý, órt qoıý nemese adamdardyń qaza bolýy, eleýli múliktik zııan keltirý ne qoǵamǵa qaýipti zardaptardyń týyndaý qaýpin tóndiretin ózge de is-áreketter jasaý nemese jasaımyn dep qorqytý, eger ondaı is-áreketter qoǵamdyq qaýipsizdikti buzý, halyqty úreılendirý ne Qazaqstan Respýblıkasy memlekettik organdarynyń, shet memleketterdiń nemese halyqaralyq uıymdardyń sheshimder qabyldaýyna yqpal etý maqsatynda jasalsa, sondaı-aq adam ómirine dál sol maqsattarda qastandyq jasaý, sol sııaqty memleket nemese qoǵam qaıratkeriniń memlekettik nemese ózge de saıası qyzmetin toqtatý ne osyndaı qyzmeti úshin kek alý maqsatynda onyń ómirine qastandyq jasaý;
terrorızmge qarsy operasııa – adam kúshin, qyzmettik ıtterdi, áskerı jáne ózge de tehnıkany, qarýlar men arnaýly quraldardy paıdalana otyryp, terrorızm aktisiniń aldyn alý, jolyn kesý, terrorısterdi, jarylǵysh qurylǵylardy zııansyzdandyrý, jeke adamdar men uıymdardyń qaýipsizdigin qamtamasyz etý, sondaı-aq terrorızm aktisiniń zardaptaryn barynsha azaıtý jáne (nemese) joıý jónindegi arnaıy is-sharalar kesheni. Tizbesi «Qazaqstan Respýblıkasy Prezıdentiniń Kúzet qyzmeti týraly» Qazaqstan Respýblıkasynyń Zańynda belgilengen kúzetiletin adamdardyń qaýipsizdigin qamtamasyz etý jónindegi kúzetý is-sharalary da terrorızmge qarsy operasııalarǵa jatady;
terrorızmge qarsy is-qımyl - terrorızmdi anyqtaý, onyń aldyn alý, jolyn kesý, ony ashý jáne tergeý, terrorızmniń zardaptaryn barynsha azaıtý jáne (nemese) joıý.
2-taraý. Terrorızmniń aldyn alý tártibi
4. Terrorızmniń aldyn alý dep aldyn ala ótkiziletin jáne terrorıstik is-áreketti júzege asyrý táýekelin múmkindiginshe barynsha azaıtýǵa, adamdardyń densaýlyǵy men ómirin saqtaýǵa, terrorızm aktisi jasalǵan jaǵdaıda onyń saldaryn barynsha azaıtýǵa baǵyttalǵan keshendi is-sharalar túsindiriledi.
5. Terrorızmniń aldyn alý:
qoǵamda terrorızmdi qabyldamaý ıdeıasyn qalyptastyrýǵa baǵyttalǵan aqparattyq-úgit nasıhat jumysyn uıymdastyrý jáne ótkizý;
terrorıstik is-áreketterge qatysqan sheteldikter men azamattyǵy joq adamdardy Qazaqstan Respýblıkasynyń aýmaǵyna enýin boldyrmaý maqsatynda qyzmetti júzege asyrý;
terrorızmdi qarjylandyrýǵa qarsy is-qımyl jasaý maqsatynda qarjy monıtorıngin ótkizý;
terrorıstik turǵydan osal obektilerdi terrorızmge qarsy qorǵaýdyń joǵarǵy deńgeıin qamtamasyz etý arqyly júzege asyrylady.
6. Terrorızmniń aldyn alý jónindegi is-sharalardy óz quzyreti sheginde Qazaqstan Respýblıkasynyń barlyq memlekettik organdary júrgizedi.
7. Aqparattyq-úgit nasıhat jumysy qoǵamdyq birlestikterdi, azamattyq qoǵamnyń basqa da ınsıtýttary men azamattardy paıdalana otyryp, konferensııalar, semınarlar, keńester, «dóńgelek ústelder», áńgimeler jáne qoǵamda onyń keıinnen taralý úrdisin zertteýmen jáne taldaýmen, ýaqtyly den qoıý sharalaryn ázirleýmen jáne qabyldaýmen terrorızm ıdeologııasynyń qylmystyq sıpaty týraly halyqty habardar etý maqsatynda buqaralyq aqparat quraldarynda aqparattyq habarlar túrindegi jalpy jáne jeke profılaktıkalyq is-sharalar uıymdastyrý jáne ótkizý jolymen júzege asyrylady.
8. Jedel izdestirý qyzmetin júzege asyratyn memlekettik organdar qoldanystaǵy zańnama sheńberinde terrorıstik uıymdar músheleriniń ne terrorıstik is-áreketke qatysqan adamdardyń Qazaqstan Respýblıkasynyń aýmaǵyna jeke enýge nemese terrorızm aktisin jasaý quraldaryn ákelýge talpynystary men umtylystaryn ýaqtyly anyqtaýǵa baǵyttalǵan qajetti jedel-izdestirý is-sharalaryn ótkizedi.
Ulttyq qaýipsizdik organdary «Terrorızmge qarsy is-qımyl týraly» Qazaqstan Respýblıkasynyń 1999 jylǵy 13 shildedegi Zańynyń 10-babynyń 2-tarmaǵyna sáıkes terrorıstik is-áreketterge qatysqan sheteldikter men azamattyǵy joq adamdardyń Qazaqstan Respýblıkasyna kelýine tyıym salýǵa quqyǵy bar.
9. Qazaqstan Respýblıkasynyń qarjy monıtorıngi jónindegi ýákiletti organy memlekettik organdarmen jáne qarjy monıtorıngi sýbektilerimen ózara is-qımyl jasaý úshin zańda belgilengen tártippen terrorızmdi qarjylandyrýǵa qarsy is-qımyl jasaıdy.
10. Terrorıstik turǵydan osal obektilerdi terrorızmge qarsy qorǵaý keshendi, uıymdastyrýshylyq, rejımdik, kúzetý, profılaktıkalyq, tárbıelik, bilim, tehnıkalyq jáne ózge de sharalar keshenin, sondaı-aq osy obektilerdiń qaýipsiz jumys isteýin terrorızm aktisiniń jasalý táýekeliniń aldyn alý jáne barynsha azaıtý, jaǵdaıyn jasaý men qamtamasyz etý úshin qabyldanatyn josparlar men baǵdarlamalardy bildiredi.
11. Terrorıstik turǵydan osal obektilerdi terrorızmge qarsy qorǵaýdy qamtamasyz etý jónindegi is-sharalar mynalardy qamtıdy:
1) obektini isten shyǵarý nemese syrttan aralasý onyń jumys isteýiniń buzylýyna ákep soqtyrýy múmkin sheshýshi, anaǵurlym osal ýchaskelerin (aımaqtaryn), qural-jabdyqtaryn, tehnologııalyq prosesterin anyqtaý (taldaý);
2) obektini fızıkalyq kúzetý men ınjenerlik-tehnıkalyq nyǵaıtylýynyń tıimdi júıesin qurý jáne ózekti jaǵdaıda qoldaý, onyń qaýipsizdigin qamtamasyz etý josparlaryn ázirleý men tekserý, tehnıkalyq kúzet quraldarynyń ınjenerlik kommýnıkasııalyq jáne kábildik jelilerine ýaqtyly qyzmet kórsetý, kúrdeli jóndeý jáne jańǵyrtý;
3) obekt personalyn terrorızm aktisi jasalǵan (qaýpi tóngende) kezde is-qımyl jasaýǵa oqytý, olardy modeldeý jáne terrorızmge qarsy sharalardyń tıisti júıesin ázirleý, sonyń ishinde dabyl jáne personal men kelýshilerge habarlaý sıgnaldaryn ornatý, olardy evakýasııalaý tásilderi, quqyq qorǵaý organdarymen ózara is-qımyl jasaý;
4) obektiniń aqparattyq jelilerin, onyń aqparattyq óńdeý, saqtaý jáne berý prosesterin avtorızasııalanbaǵan enýden, buzylýdan, túrlendirýden, qol jetkizýdi tejeýden qorǵaý jónindegi uıymdastyrýshylyq, tehnıkalyq jáne tehnologııalyq keshenin iske asyrý.
12. Terrorızmge qarsy is-qımyl salasyndaǵy qyzmetti úılestirý jónindegi ýákiletti memlekettik organ terrorızmge qarsy is-qımyldy júzege asyratyn memlekettik organdarmen ózara is-qımyl jasaýda terrorızmniń aldyn alý jónindegi is-sharalardy ǵylymı-ádistemelik qamtamasyz etedi.
3-taraý. Terrorızmniń jolyn kesý tártibi
13. Terrorızmniń jolyn kesý terrorızmge qarsy operasııalardy ótkizý jolymen júzege asyrylady, olar:
terrorızm aktisiniń jolyn kesý, onyń saldaryn barynsha azaıtý men joıý jónindegi terrorızmge qarsy operasııalar;
kúzetiletin tulǵalardyń qaýipsizdigin qamtamasyz etý jónindegi terrorızmge qarsy operasııalar bolyp bólinedi.
14. Terrorızmge qarsy operasııalardy tikeleı ótkizýdi Qazaqstan Respýblıkasy Ulttyq qaýipsizdik komıteti (budan ári – UQK), Qazaqstan Respýblıkasy Ishki ister mınıstrligi (budan ári – IIM), Qazaqstan Respýblıkasy Prezıdentiniń Kúzet qyzmeti (budan ári – PKQ) jáne Qazaqstan Respýblıkasy Qorǵanys mınıstrligi (budan ári – Qorǵanysmıni) júzege asyrady.
15. Terrorızmge qarsy operasııalardy ótkizý úshin turaqty jumys isteıtin respýblıkalyq jáne oblystyq, respýblıkalyq mańyzy bar qalalyq jáne astananyń jedel shtabtary (budan ári – jedel shtabtar) qurylady, olardyń mártebesi men ókilettigi terrorızmge qarsy operasııalardyń árbir túri boıynsha UQK-nyń, IIM-niń, PKQ-nyń jáne Qoǵanysmıniniń birlesken buıryǵymen bekitiletin erejelerde anyqtalady.
Bul rette terrorızm aktisiniń jolyn kesý jáne kúzetiletin tulǵalardyń qaýipsizdigin qamtamasyz etý jónindegi terrorızmge qarsy operasııalar júrgizý jónindegi shtabtar týraly ereje derbes bekitiledi.
16. Eger joǵary turǵan jedel shtabtyń terrorızm aktisi jasalǵan orynǵa ýaqytyly kelý múmkindigi bolmaǵan jaǵdaıda, obylystyq jedel shtab bekitetin tizbesi boıynsha oblystardyń eldi mekenderinde terrorızmge qarsy operasııany uıymdastyratyn jáne ótkizetin qalalyq jáne aýdandyq jedel shtabtar qurylady.
17. Jedel shtabtardyń kúshteri men quraldarynyń quramy, jedel toptardy qalyptastyrý tártibi, terrorızmge qarsy operasııalarǵa daıyndalý barysynda jáne ótkizý prosesindegi olardyń is-qımyldarynyń egjeı-tegjeıli tizbesi UQK-nyń, IIM-niń, PKQ-nyń jáne Qorǵanysmıniniń, sondaı-aq óz quzyreti sheginde terrorızmge qarsy is-qımylǵa qatysatyn ózge de memlekettik organdardyń birlesken buıryǵymen naqtylanady.
18. О́zge memlekettik organdar terrorızmge qarsy operasııalarǵa óz quzyreti sheginde jedel shtab basshysynyń suraýy boıynsha qarjy qarajatyn, aqparat, kólik jáne baılanys quraldaryn, medısınalyq jabdyq, dári-dármekter men medısınalyq qyzmet kórsetýdi, materıaldyq-tehnıkalyq qamtamasyz etýdi usyný arqyly qatysady.
19. Terrorızm aktisiniń jolyn kesýge tartylǵan memlekettik organdardyń kúshteri men quraldarynyń ózara is-qımylynyń tıimdiligin arttyrý maqsatynda terrorızmge qarsy árbir operasııanyń jeke túri boıynsha jedel shtabtyń basshysy terrorızmge qarsy operasııa júrgizýdiń vedomstvoaralyq úlgilik josparyn (budan ári – úlgilik jospar) bekitedi, onda:
tartylatyn kúshter men quraldardyń esebi júrgiziledi, jedel toptardyń ataýy, adam sany, ornalasqan jeri, qarý-jaraǵy jáne tehnıkalyq jaraqtanýy kórsetiledi, olardyń basshylary taǵaıyndalady;
terrorızmge qarsy operasııalardyń qatysýshylaryna habarlaý shemasy, jedel shtabtyń jáne onyń jedel toptarynyń alǵashqy jınalý orny men ornalasatyn jeri ázirlenedi;
ózge memlekettik organdardyń terrorızmge qarsy operasııaǵa qatysý deńgeıi belgilenedi;
terrorızmge qarsy operasııany ázirleý men ótkizýdiń jalpy tetigi naqtylanady.
20. Úlgilik jospardyń is-sharalary ártúrli deńgeıdegi terrorızmge qarsy oqýlar men jattyǵýlar ótkizý jolymen pysyqtalady, onyń tártibi UQK-nyń, IIM-niń, PKQ-nyń jáne Qorǵanysmıniniń birlesken buıryǵymen reglamentteledi.
4-taraý. Terrorızm aktisiniń saldaryn barynsha azaıtý jáne (nemese) joıý tártibi
21. Terrorızm aktisiniń saldaryn barynsha azaıtý jáne (nemese) joıý úshin memlekettik jáne memlekettik emes órt jáne mamandandyrylǵan órt bólimderi, Qazaqstan Respýblıkasy Tótenshe jaǵdaılar mınıstrliginiń jedel qutqarý bólimsheleri, erikti qutqarý quralymdary, áýe, sý nemese temir jol kólikteriniń tıisti bólimsheleri, jergilikti atqarýshy organdardyń jedel den qoıý jasaqtary qalalyq (aýdandyq) kommýnaldyq qyzmetterdiń avarııalyq-tehnıkalyq komandalarymen birlesip tartylady.
22. Terrorızm aktisi jasalǵan kezde halyqty medısınalyq qamtamasyz etýdi apat medısınasy qyzmetiniń mekemeleri men quralymdary – jedel medısınalyq kómek kórsetý brıgadalary, mamandandyrylǵan sanıtarııalyq-toksıkologııalyq jáne toksıko-terapevtik brıgadalar, densaýlyq saqtaý uıymdary men sýbektileriniń toksıkologııalyq bólimsheleri uıymdastyrady jáne júzege asyrady.
23. Zııandy óteý, sondaı-aq terrorızm aktisinen jábir kórgen adamdardy áleýmettik ońaltý zańnamada belgilengen tártippen júzege asyrylady.