Prezıdent Úkimettiń keńeıtilgen otyrysynda «Ekonomıkany yryqtandyrý sharalary týraly» Jarlyqty oryndaý máselesine arnaıy toqtaldy, dep habarlaıdy Egemen.kz.
Memleket basshysynyń aıtýynsha bul jumys is júzinde emes, qaǵaz júzinde ǵana oryndalyp jatyr.
«Quzyrly organdar qujatta kórsetilgen tapsyrmalarǵa atústi qaraıdy. Bıznes júrgizýge qolaıly jaǵdaı jasaýdy emes, qur esep berýdi oılaıdy. Sonyń saldarynan Jarlyqta aıqyndalǵan basty mindetter tolyǵymen oryndalǵan joq.
Mysal retinde memlekettik aktıvterdi jekeshelendirý úderisin alyp qaraıyq. Úkimet jeke menshikke ótýge tıis 473 kásiporynnyń tizimin byltyr qazan aıynda bekitti. Biraq aktıvterdi saýdaǵa shyǵarmaq túgili ony satýǵa daıyndyq sharalarynyń ózi áli bastalǵan joq» dedi Memleket basshysy.
Prezıdent bul jaǵdaı jeke kásipkerliktiń damýyna kedergi keltirip, básekelestikti tejeıtinin atap ótti.
«Memlekettik múlik týraly» jańa zań da qabyldanbady. «Qandaı kedergi paıda boldy? Memlekettik organdar nelikten óz aktıvterinen aıyrylǵysy kelmeıdi?» degen suraqtar bolýy múmkin. Naqty sebepter bar shyǵar, biraq olar týraly beıhabarmyn.
Sebebi bul aktıvter memleket bıýdjeti esebinen qamtamasyz etiledi, ıaǵnı, oǵan qazynadan qomaqty qarajat jumsalyp jatyr.
Úkimet Jarlyqty oryndaýǵa qatysty ustanymdardy bir aıdyń ishinde qaıta qaraýǵa tıis. Basty maqsat – bızneske shyn máninde qolaıly jaǵdaı jasaıtyn naqty sharalar qabyldaý», dedi Prezıdent.
Prezıdent Úkimetke jyl sońyna deıin Áleýmettik medısınalyq saqtandyrý qorynyń jumysyn tolyq sıfrlandyrýdy tapsyrdy