Ekolog kúni qarsańynda, 2026 jylǵy 1 maýsymda Qazaqstanǵa Chehııa Respýblıkasynan kertaǵynyń (Prjevalskıı jylqylarynyń) kezekti toby jetkizildi, dep habarlaıdy Egemen.kz
Bul – álemde saqtalǵan jalǵyz jabaıy jylqy túriniń popýlıasııasyn qalpyna keltirýge baǵyttalǵan halyqaralyq joba aıasynda ákelingen janýarlardyń kezekti legi.
Arnaıy áýe reısimen janýarlar Chehııadan Qostanaı qalasynyń halyqaralyq áýejaıyna jetkizildi. Odan ári olar arnaıy jabdyqtalǵan avtokólikpen Qostanaı oblysy Amangeldi aýdanyndaǵy «Altyn Dala» memlekettik tabıǵı rezervatyna tasymaldanady. Reıntrodýksııa ortalyǵynda janýarlar mamandardyń baqylaýymen beıimdelý kezeńinen ótip, keıin tabıǵı mekendeý ortasyna jiberýge daıyndalady.
Tarıhı turǵydan kertaǵy Qazaqstan aýmaǵynda mekendegen jáne Qazaqstan dalalarynyń tabıǵı murasynyń bir bóligi bolyp tabylady. Alaıda XX ǵasyrdyń ortasyna qaraı bul túr jabaıy tabıǵattan joıylyp ketti. Ony qalpyna keltirý halyqaralyq saqtaý jáne reıntrodýksııa baǵdarlamalarynyń arqasynda múmkin boldy.
Búginde Qazaqstan osy biregeı túrdi óziniń tarıhı mekendeý ortasyna qaıtarý boıynsha aýqymdy baǵdarlamany júzege asyrýda.
Joba Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti, Praga haıýanattar baǵy, «Tırpark Berlın» haıýanattar baǵy, Qazaqstannyń bıoalýantúrlilikti saqtaý qaýymdastyǵy, Frankfýrt zoologııalyq qoǵamy jáne basqa da halyqaralyq seriktestermen birlesip júzege asyrylýda.
Qazaq dalasyna kansha Prjevalskıı jylqysy jetkizildi?
Qazaqstan men Praga haıýanattar baǵy arasyndaǵy yntymaqtastyq týraly memorandýmǵa sáıkes, 2029 jylǵa deıin Qazaqstanǵa 40 kertaǵyny jetkizý josparlanǵan. 2024 jáne 2025 jyldary «Altyn Dala» rezervatyna janýarlardyń alǵashqy eki toby ákelingen bolatyn. Al bıylǵy jyldyń mamyr aıynda buryn jetkizilgen janýarlardyń bir bóligi alǵash ret jabaıy tabıǵatqa jiberildi.
Jobanyń negizgi maqsaty – Ortalyq Qazaqstan dalalarynda kertaǵynyń turaqty popýlıasııasyn qalyptastyrý jáne dala ekojúıelerin qalpyna keltirý.
Jobany iske asyrý Qazaqstan úshin úlken mańyzǵa ıe. Ol bıologııalyq ártúrlilikti saqtaýǵa, tarıhı turǵydan joǵalǵan janýarlar túrlerin qalpyna keltirýge, tabıǵat qorǵaý salasyndaǵy halyqaralyq yntymaqtastyqty nyǵaıtýǵa jáne elimizdiń dala ekojúıeleri men sırek kezdesetin jabaıy janýarlardy qorǵaý isindegi kóshbasshy memleket retindegi bedelin arttyrýǵa yqpal etedi.