Prezıdent Qasym-Jomart Toqaev taza ári paıdaly japyraqty kókónis túrlerin ósiretin GREEN ESO zamanaýı jylyjaı kesheniniń qyzmetimen, sondaı-aq Qazaqstan naryǵyndaǵy óndiriske qoldanylatyn tehnologııalarmen tanysty, dep habarlaıdy Egemen.kz Aqordanyń baspasóz qyzmetine silteme jasap.
Sharýashylyqtaǵy barlyq úderis hımııalyq óńdeýsiz, tyńaıtqyshtar men pestısıdterdi qoldanbaı iske asyrylady. Búginde 160 adam eńbek etetin kásiporynnyń ónimderi Qazaqstannyń 10 qalasyna jetkiziledi.
Prezıdent «Lýkomore» tuqymbaǵy – baq ortalyǵyn aralap kórdi. Bul – avtomattandyrylǵan jumys arqyly jylyna 1,5 mıllıon túpke deıin aǵash, sándik butalar men gúlder ósirýge qaýqarly elimizdegi iri ortalyq.
Onyń ónimderi qalalarymyzdyń barlyǵynda suranysqa ıe, sonymen qatar О́zbekstan men Qyrǵyzstanǵa eksporttalady.
Memleket basshysyna Turanga sándik ósimdikter tuqymbaǵyn uıymdastyrý aıasynda atqarylyp jatqan jumystar jóninde baıandaldy. Onda 130 myńǵa jýyq aǵash jáne 3,5 mıllıon túp buta ósirý josparlanyp otyr.
Eske sala keteıik, búgin Memleket basshysy Qasym-Jomart Toqaev Alataý qalasyn damytý jónindegi keńeste sóz sóılep, jobaǵa qatysty zańnamalyq jumys jyldam júrgizilýi tıis ekenin aıtty.