Memleket basshysy Qasym-Jomart Toqaev Alataý qalasyn damytý jónindegi keńeste energııa tıimdiligin arttyrý men resýrstardy utymdy paıdalaný máselesine basa nazar aýdardy, dep habarlaıdy Egemen.kz.
Prezıdent Alataý qalasy resýrstardy ońtaıly, únemdep qoldanýda úlgi bolýǵa tıis ekendigin aıtty.
«Osy problemany sheshý úshin «First fuel» tujyrymdamasyna erekshe nazar qajet dep sanaımyn. Halyqaralyq energetıka agenttigi ázirlegen bul tujyrymdama energııanyń tıimdiligi men qýat únemdeýdi arttyrý sharalaryn keńinen engizýdi qarastyrady. Únemdelgen energııanyń baǵasy jańadan óndiriletin elektr energııasynyń qunyna qaraǵanda, tipti óndiristiń qoljetimdi túrlerimen salystyrǵanda 2-3 ese tómen bolatyny eseptelgen. Bul jerde mindetti túrde paıdalanýǵa bolatyn úlken áleýet jatyr. Qazaqstannyń qazirgi qýat shyǵyny aýqymy jaǵynan jekelegen óńirler tutynatyn jáne óndiretin energııa kólemine teń. О́nerkásip mınıstrliginiń aqparaty boıynsha, jelilerdegi elektr energııasynyń shyǵyny shamamen 10 paıyzdy quraıdy, jylý energııasynyń shyǵyny da 10 paıyzǵa jýyq. Máselen, 2024 jyly elektr energııasynyń jalpy shyǵyny 9 mıllıardtan asa kılovatt saǵatty qurady. Bul búkil Atyraý oblysyndaǵy tutyný kóleminen artyq», dedi Qasym-Jomart Toqaev.
Prezıdent: Alataý qalasy qurylysynyń negizgi qaǵıdalary jańa Konstıtýsııaǵa engizildi
Prezıdent sondaı-aq Qazaqstannyń energııa tutyný kórsetkishteri álemdik deńgeımen salystyrǵanda áldeqaıda joǵary ekenin aıtty.
«Strategııalyq josparlaý jáne reformalar agenttiginiń aqparatyna sáıkes, elimiz – álemde energııany eń kóp tutynatyn ekonomıkalardyń biri. Salystyrý úshin aıtar bolsaq, Qazaqstannyń IJО́-degi energııa tutynýy ortasha álemdik kórsetkishten 2 ese joǵary, al Ekonomıkalyq yntymaqtastyq jáne damý uıymy elderi kórsetkishterinen 3,5 ese artyq. Moıyndaýymyz kerek, saladaǵy túıtkil kóbinese jelilerdiń tozyǵy jetkeninde jáne elektr energııasyn tasymaldaýdaǵy uzaq qashyqtyqqa ǵana baılanysty emes. Sonymen birge energııa tutynýdaǵy mádenıetimizdiń tómendiginde de bolyp otyr. Bul baǵytta Úkimet, ákimdikter, ulttyq kompanııalar jáne qoǵam belsendileri atqaratyn jumys kóp. Biz halyqqa elektr energııasyn únemdeý jóninde túsindirý jumystaryn júrgizýimiz qajet», dedi Memleket basshysy.
Jıynda Prezıdent Alataý jobasyna qatysty zańnamalyq jumystar jyldam júrgizilýge tıis ekendigin atap ótti.