Alataý qalasyn damytý jónindegi keńeste Memleket basshysy ınvestorlarǵa barynsha jaıly jaǵdaı jasaýdy jáne olarǵa joǵary deńgeıde qyzmet kórsetýdi asa mańyzdy mindet retinde atady, dep habarlaıdy Egemen.kz.
«Qazir aldymyzda turǵan jumys – asa mańyzdy: ınvestorlarǵa barynsha jaıly jaǵdaı jasalýǵa tıis jáne olarǵa joǵary deńgeıde qyzmet kórsetilýi qajet. Eń aldymen halyqaralyq talaptardyń qatań saqtalýyna basa mán bergen jón. Ásirese, ulttyq zańnama júıesinde qamtylmaǵan máseleler boıynsha álemdik ozyq tájirıbeni keńinen qoldanǵan abzal. Naǵyz ozyq ári jedel damý jolyna túsemiz desek, bul jumysty mindetti túrde qolǵa alýymyz kerek. Tıisti laýazymdy tulǵalar eshkimnen qoryqpaı, batyl sheshimder qabyldaýy kerek. Bul ótinish ıa keńes emes, bul – naqty tapsyrma», dedi Prezıdent.
Prezıdenttiń aıtýynsha, arnaıy quqyqtyq mártebesi bar qalalar jahandyq kapıtaldy tartý úshin dál osylaı batyl ári belsendi jumys istep, aldyńǵy qatarǵa shyǵady.
«Shetel ınvestısııasyn qorǵaý, «bir tereze» qaǵıdaty boıynsha qyzmet kórsetý, sharttardyń ashyqtyǵyn jáne memleket usynatyn kepildikterdiń buljymastyǵyn qamtamasyz etý – negizgi másele, kezek kúttirmeıtin mindet. Bul saladaǵy jumystyń bári nátıjeli bolsyn desek, ınvestorlardy kóptep tartý kerek bolady, al ol úshin qolaıly orta jasaýymyz kerek jáne tıimdi ekojúıeni qurýymyz qajet. Bul, árıne, óte aýqymdy sharýa. Sondyqtan aldymen ózekti, ıaǵnı basymdyqqa ıe baǵyttarǵa aıryqsha mán berý kerek: IT, ónerkásip, kólik jáne logıstıka, týrızm, medısına, bilim berý salalaryn damytý óte mańyzdy», dedi Memleket basshysy.
Memleket basshysy: Alatau city jobasyna zor úmit artyp otyrmyz
Sonymen qatar, Prezıdent otandyq bıznes ókilderi qalany damytýdyń bel ortasynda júrýi qajet ekenin aıtty.
«Maǵan búginde 50-den astam ınvestısııalyq jobadan turatyn pýl jasaqtalǵany jóninde málimdedi. Jalpy kólemi eki trıllıon teńgege jýyq qarjy quıylǵan bastamalar aıasynda 50 myńnan asa jumys orny ashylady. Aldaǵy bir-eki jyl ishinde basym salalarǵa ınvestorlar tarta otyryp, atalǵan portfeldi keńeıte túsýimiz kerek», dedi Memleket basshysy.
Qasym-Jomart Toqaevtyń sózinshe, ásirese, otandyq bıznesti yntalandyrýǵa basa nazar aýdarylǵany jón. Bıznes ókilderi syrttan baqylaýshy bolmaı, qalany damytýdyń bel ortasynda júrýi qajet.
«Munyń mańyzy zor. О́ıtkeni, Shenchjen sekildi qalalardyń tájirıbesi alǵashqy onjyldyqta shahardyń órkendeýine jumsalǵan ınvestısııanyń basym bóligin syrtqy emes, ishki salymdar quraǵanyn kórsetip otyr. Shenchjen, Haınan, Dýbaı, Sıngapýr sııaqty qalalardyń bárinde memleket alǵashqy ınvestor retinde bazalyq ınfraqurylym qalyptastyryp berdi. Osylaısha, bızneste táýekel azaıyp, tıisti jaǵdaı jasalatyn ornyqty ınvestısııalyq sıkl iske qosyldy», dedi Prezıdent.
Prezıdent: Alatau City alǵashqy tolyq sıfrly qala bolady
Sondaı-aq, Qasym-Jomart Toqaev Úkimet bastapqy kezeńde qalanyń negizgi ınfraqurylymyn damytý maqsatynda turaqty túrde qarjy bólip otyrýy kerektigin atap ótti.
«Jalpy, mundaı ınvestısııalyq tásil – ábden oryndy jáne oıǵa qonymdy. Memleket ınfraqurylymǵa ınvestısııa salsa, jeke kapıtal da kele bastaıdy. Sonyń arqasynda salyq túsimi artady, jańa ınfraqurylym paıda bolady. Osylaısha, qolǵa alynǵan jumystyń aýqymy keńeıe beredi. Al negizgi ınfraqurylymǵa bastapqy ınvestısııa salý mindeti tek jeke sektorǵa ǵana júktelse, jobalardyń ınvestısııalyq tartymdylyǵy álsireıdi. Mundaı jaǵdaı tarıfi joǵary monopolııa qurylymdarynyń paıda bolýyna ákep soqtyrady jáne aqyr sońynda damýdy tejeıdi», dedi Qasym-Jomart Toqaev.
Prezıdent atap ótkendeı, sondyqtan Úkimet bastapqy kezeńde qalanyń negizgi ınfraqurylymyn damytý maqsatynda turaqty túrde qarjy bólip otyrýy kerek. Basqa jol joq.
«Qajet bolsa, ornyqty kiris qory qalyptasqansha Alataýǵa qosymsha lımıtterdi jáne memlekettiń kepildigimen qaryz alý quqyǵyn berýge bolady. Degenmen bıýdjet qarjysy tek ınvestısııalyq maqsatqa saı jumsalýǵa tıis. Qalanyń uzaqmerzimdi damý baǵdary basty nazarda bolýy kerek», dedi Memleket basshysy.
Eske salaıyq, búgin Prezıdent jumys saparymen Almaty oblysyna bardy.