Alataý qalasyn damytýǵa arnalǵan keńestegi sóılegen sózinde Qasym-Jomart Toqaev Alatau City úlken derekterdi, ozyq tehnologııalardy jáne «aqyldy» basqarý tetikterin negizge ala otyryp, ınfraqurylymy, qalalyq servısteri men ekonomıkasy ózara yqpaldastyrylǵan alǵashqy tolyq sıfrlyq qala bolatynyn atap ótti, dep habarlaıdy Egemen.kz.
Prezıdenttiń aıtýynsha, qalany damytýdyń ornyqty modelin qurý qajet.
«Jobany júzege asyrý aıtarlyqtaı kúrdeli jáne operasııalyq shyǵyndardy qajet etedi. Bul oraıda turaqty, boljamdy kiris bazasyn qalyptastyrǵan jón. Qazirgi qarjylyq-ekonomıkalyq modeldiń keleshek shyǵyndardy jaba almaı qalý qaýpi de bar. Investısııa aǵyny men bıznesti damytýǵa basa mán berip otyrmyz. Degenmen bul – kepildik berilgen tabys kózi emes, bar bolǵany boljam men úmit qana», dedi Prezıdent.
Prezıdent: Alataý qalasy qurylysynyń negizgi qaǵıdalary jańa Konstıtýsııaǵa engizildi
Qasym-Jomart Toqaevtyń aıtýynsha, budan bólek, bastapqy kezeńde kózdelgen jeńildikter salyq túsimderiniń azaıýyna ákeledi. Bul qurylymdyq alshaqtyqqa uryndyrýy múmkin. О́ıtkeni qalany qamtamasyz etý men damytýǵa qarajat qajet kezde túsimder keshigýi nemese bastapqyda tómen bolýy yqtımal.
«Sondyqtan Alataýdy damytý jónindegi keńes qala ákimshiligimen birge uzaqmerzimdi ornyqty damýdyń tıimdi qarjy-ekonomıkalyq úlgisin ázirleýi kerek. Sonymen birge qalany strategııalyq josparlaýǵa negiz bolatyn qujattardy bekitken jón. Investorlar men seriktester, azamattar 10, 20 nemese 30 jyldan keıin Alataý qalasynyń qandaı bolatynyn túsinýi qajet», dedi Prezıdent.
Memleket basshysy: Alatau city jobasyna zor úmit artyp otyrmyz
Prezıdenttiń sózinshe, Alatau City úlken derekterdi, ozyq tehnologııalardy jáne «aqyldy» basqarý tetikterin negizge ala otyryp, ınfraqurylymy, qalalyq servısteri men ekonomıkasy ózara yqpaldastyrylǵan alǵashqy tolyq sıfrly qala bolady. Basty baǵdar – osy.
«Kelesi jyly qalany damytýǵa belsene kirisý úshin strategııalyq qujattardyń barlyǵyn (Uzaqmerzimdi jospar, Keshendi baǵdarlama jáne Damý strategııasy) jyl sońyna deıin qabyldaý kerek. Mundaı iri jáne uzaqmerzimdi jobalardy iske asyrýda prosesti jedel, qarqyndy jáne eń áýeli sátimen bastaý óte mańyzdy. Sozbaqqa salsaq, is toqyrady dep sanaı berińizder», dedi Qasym-Jomart Toqaev.
Aıta keteıik, búgin Memleket basshysy jumys saparymen Almaty oblysyna bardy.