Densaýlyq saqtaý mınıstrligi 21 myńnan astam uıym men 275 myń medısına qyzmetkerin biryńǵaı sıfrlyq kontýrǵa biriktirdi, dep habarlaıdy Egemen.kz
Qazaqstanda densaýlyq saqtaýdyń biryńǵaı sıfrlyq kontýryn qalyptastyrý jumystary jalǵasýda. Búginde biryńǵaı júıede 21,3 myń medısınalyq uıym, 275 myń medısına qyzmetkeri jáne 141 myńnan astam medısınalyq tehnıka birligi týraly derekter jınaqtalǵan. Bul týraly Densaýlyq saqtaý mınıstrligine qarasty Respýblıkalyq elektrondyq densaýlyq saqtaý ortalyǵynyń bas dırektory Nurshat Sarybek Densaýlyq saqtaý mınıstrliginiń alqa otyrysynda málimdedi.
«Biz bytyrańqy avtomattandyrý kezeńinen densaýlyq saqtaýdyń biryńǵaı sıfrlyq ekojúıesin qurýǵa kóshtik. Búginde salany basqarý qaǵıdattaryn túbegeıli ózgertetin asa mańyzdy platformalardyń engizilý nátıjelerin kórip otyrmyz», - dedi Nurshat Sarybek.
1S júıelerimen jáne kadrlyq tizilimdermen júrgizilgen sıfrlyq ıntegrasııanyń nátıjesinde derekterdi qolmen engizý úlesi 0%-ǵa deıin tómendep, medısına qyzmetkerlerine túsetin ákimshilik júkteme 30-40%-ǵa qysqardy.
«Biz 21 300-den astam medısınalyq uıym men 275 000 qyzmetker týraly aqparatty biryńǵaı kontýrǵa biriktirý arqyly derekterdiń shashyrańqylyǵyn joıdyq», – dep atap ótti Nurshat Sarybek.
Densaýlyq saqtaýdy sıfrlandyrýdyń negizgi baǵyttarynyń biri áıelder men balalardyń densaýlyǵyn monıtorıngileý júıesi boldy. Qazirgi ýaqytta sıfrlyq beıinmen 6,8 mln bala men 4,8 mln áıel qamtylǵan, al monıtorıng 80 mańyzdy kórsetkish boıynsha júrgiziledi. Júkti áıeldiń aıyrbastaý kartasy endi eGov Mobile qosymshasy arqyly qoljetimdi.
Sondaı-aq pasıentterdi dınamıkalyq baqylaýdyń jańa formaty engizilýde. Búginde sıfrlyq monıtorıng aıasynda 3,6 mln adam qamtylǵan. «Sıfrlyq baqylaý kartasy» dárigerge pasıenttiń qaı óńirde júgingenine qaramastan, onyń emdeýge jatqyzylý tarıhyn, taǵaıyndaýlaryn jáne reseptterin kórýge múmkindik beredi.
Ambýlatorııalyq dári-dármekpen qamtamasyz etý salasynda dárilik zattardy derbestendirilgen josparlaý júıesi engizildi. Qazirgi tańda ol 1,9 mln pasıent pen 683 medısınalyq uıymdy qamtıdy. 2026 jylǵa arnalǵan josparlaý kólemi 330,9 mlrd teńgeni qurady. Tańbalaý kodtarynyń engizilýi dárilik preparattardyń qaldyqtaryn onlaın baqylaýǵa jáne olardyń qozǵalysyn tolyq qadaǵalaýǵa múmkindik berdi.
«Biz dárilik zattardy josparlaýdyń túbegeıli jańa modelin iske qostyq – endi josparlaý ortasha normatıvterge emes, naqty pasıenttiń qajettiligine negizdeledi», – dedi respýblıkalyq ortalyq basshysy.
Sıfrlyq transformasııanyń kelesi kezeńi dárigerlerdi biryńǵaı ınterfeıspen jáne jasandy ıntellekt kómekshisimen qamtamasyz etetin Biryńǵaı memlekettik medısınalyq aqparattyq júıeni (BMMAJ) iske qosý bolmaq. Jobanyń sheńberinde 1 900-den astam medısınalyq uıymdy qosý jáne jekemenshik medısınalyq aqparattyq júıelerden biryńǵaı memlekettik platformaǵa kezeń-kezeńimen kóshý josparlanýda.
Densaýlyq saqtaý mınıstri Aqmaral Álnazarova óńirlerge júıelerdi arhıvtik derektermen qysqa merzimde tolyqtyrýdy, sondaı-aq biryńǵaı derekter qoımasy men perspektıvalyq júıelerdegi málimetterdi turaqty paıdalaný men ózektendirýdi qamtamasyz etýdi tapsyrdy.
Sonymen qatar vedomstvo basshysy «RBJ» aqparattyq júıesindegi jyljymaıtyn múlik nysandary týraly málimetterdiń tolyq ózektiligi men durystyǵyn qamtamasyz etý, eńbek resýrstary teńgerimin obektıvti qalyptastyrý úshin kadrlyq derekterdi verıfıkasııalaý, sondaı-aq qarjylyq jáne salalyq aqparattyq júıelerdiń arasyndaǵy derekterdi sınhrondaýdy aıaqtaý qajettigin atap ótti.
Medısınalyq kómektiń sapasy men qaýipsizdigi máselelerine erekshe nazar aýdarý tapsyryldy. Osyǵan baılanysty medısınalyq qyzmetke personaldy jiberý tártibine baqylaýdy kúsheıtý júkteldi.