«Nur Otan» partııasy oblystyq fılıaly ǵımaratynda Parlament Májilisiniń depýtattary Baqtyqoja Izmuhambetov, Gleb Shegelskıı, Quralaı Qaraken jáne Abaı Tasbolatov oblys ardagerlerimen kezdesti.
Kezdesýdi qysqasha sóz sóılep ashqan oblys ákimi Berdibek Saparbaev ótken jyly óńirde atqarylǵan jumystarmen tanystyra kelip, aýmaqtyń áleýmettik-ekonomıkalyq damý kórsetkishterine keńinen toqtaldy.
Sodan keıin májilismen B.Izmuhambetov sóz alyp, jumys saparynyń maqsaty, Parlament Májilisiniń jumysy týraly jan-jaqty baıandady. Ol el táýelsizdiginiń 25 jylynda qol jetken tabystarymyzdy Elbasy N.Nazarbaevtyń sarabdal saıasatymen sabaqtastyra áńgimeledi. Jıynda sóz sóılegen oblystyq ardagerler keńesiniń tóraǵasy Keńes Birmanov óńirde 85951 ardager turatynyn, olardyń 101-i Uly Otan soǵysynyń ardageri, 1022-si soǵys ardagerine teńestirilgender, 8027-si tyl ardageri ekenin jetkizdi. Olardyń oblystyq, bir qalalyq, on eki aýdandyq ardagerler keńesterine biriktirilgenin, 317 bastaýysh uıym jumys isteıtinin atap ótti. Onyń aıtýynsha, ótken jyly ardagerlerge járdemaqyǵa oblys boıynsha jergilikti bıýdjetten 270 mıllıon teńge bólingen.
О́ńirge kelgen Parlament Májilisiniń depýtattary aldaǵy kúnderi qalanyń birqatar eńbek ujymdarynda, Qarǵaly, Mártók, Muǵaljar jáne basqa aýdandarda bolyp, jurtshylyqpen júzdesedi dep kútilýde.
Satybaldy SÁÝIRBAI,
«Egemen Qazaqstan»
AQTО́BE
Sýretti túsirgen
Maksım TOKAR