Qazaqstan ulttyq arnasynyń telejúrgizýshisi, Konstıtýsııalyq komıssııa múshesi Erqanat Kópjasaruly jańa Konstıtýsııa jobasyndaǵy sóz erkindigi týraly baptardyń mańyzy jóninde pikir bildirdi, dep habarlaıdy Egemen.kz.
Komıssııa múshesi Ata Zań jobasyndaǵy sóz bostandyǵy men ǵylymı-tehnıkalyq, kórkem shyǵarmashylyq erkindigine qatysty baptarǵa toqtaldy.
«Erkin oısyz el kósegesi kógermeıdi, ashyq pikir almasýsyz alǵa baspaıdy. Jańa jobada sóz bostandyǵyn shekteýge qatysty norma joq. Basty maqsat – jaýapkershilik júgin kúsheıtý, arandatýshylyq áreketterdiń aldyn alý. Sondaı-aq, jobada aqparatty erkin alý men taratý quqyǵynyń aıqyn bekitilýi – órkenıetke umtylǵan jurtqa laıyq batyl qadam», dedi jýrnalıst Konstıtýsııalyq komıssııanyń toǵyzynshy otyrysynda.
Onyń aıtýynsha, aqparatqa qol jetkizý quqyǵynyń naqty tetiktermen bekitilýi baspasózdiń demin ashyp, memlekettik organdardyń jaýapkershiligin arttyrady.
«Eń mańyzdysy, erkindik pen jaýapkershiliktiń bir arnaǵa toǵysýy. Adamnyń ar-namysy men abyroıyn bıik qoıý, ulttyq qundylyqtardy qadirleý – erkindikti jelbýazdyqqa aınaldyrmaýdyń, ony el múddesine qyzmet etkizýdiń parasatty qadamy. Mundaǵy erkindik – júgensizdik emes, memlekettik sanaǵa negizdelgen jaýapkershilik. Osy zańnamalyq ustanym pikir alýandyǵynyń tynysyn ashyp, salaýatty synnyń órisin keńeıtedi. El birligine syzat túsiretin jónsizdikke tosqaýyl qoıady», dep tolyqtyrdy Erqanat Kópjasaruly.
Erlan Qarın: Elimiz alǵashqylardyń biri bolyp sıfrlyq derekterdi qorǵaý normasyn Ata Zańǵa engizip otyr
Sóz sońynda ol usynylyp otyrǵan Konstıtýsııalyq ózgerister jýrnalıstıkanyń basty mıssııasyn – qoǵam men bılik arasyndaǵy altyn kópir bolýdy, aqıqatty aına-qatesiz jetkizýdi, syndarly suhbat mádenıetin qalyptastyrýdy júzege asyrýǵa múmkindik beretinin atap ótti.