Qazaq ulttyq agrarlyq zertteý ýnıversıtetinde eki márte Sosıalıstik Eńbek Eri, «Dala akademıgi», dańqty shopan, «Malshylardyń marshaly» atanǵan Jazylbek Qýanyshbaevtyń 130 jyldyq mereıtoıyna arnalǵan «Qazaqstannyń qoı sharýashylyǵy: dástúri, damýy jáne bolashaǵy» atty halyqaralyq ǵylymı-tájirıbelik konferensııa ótti, dep habarlaıdy Egemen.kz
Aýqymdy tájirıbelik konferensııaǵa kórshi Reseı men О́zbekstannan akademık, ǵalymdar, sondaı-aq elimizdiń kórnekti memleket jáne qoǵam qaıratkerleri, aımaqtaǵy joǵarǵy oqý oryndarynyń professorlary men basshylary, ustazdar qaýymy jáne stýdentter qatysty.
Eki márte Sosıalıstik Eńbek Eri Jazylbek Qýanyshbaevtyń ónegeli ómiri men eńbek jolyn búgingi urpaqqa úlgi ete otyryp, elimizdegi qoı sharýashylyǵyn damytýdyń zamanaýı jańa baǵyttaryn jetildirýdiń ózekti máselelerin talqylaý maqsatynda ótken konferensııany KazNARU basqarma tóraǵasy – rektor, Prezıdent janyndaǵy UǴA prezıdenti, akademık Aqylbek Kúrishbaev ashty.
«Memleket basshysy Qasym-Jomart Toqaev Qazaqstan halqyna Joldaýynda aýyl sharýashylyǵy – bizdiń negizgi resýrsymyz ekendigin atap ótken bolatyn. Agrarlyq sala – el ekonomıkasynyń tiregi ǵana emes, halyqtyń ál-aýqaty men azyq-túlik qaýipsizdigin qamtamasyz etetin strategııalyq mańyzdy baǵyt. Sondyqtan bul salanyń damýyna úles qosqan eńbek adamdarynyń qajyrly eńbegin nasıhattaý, olardyń mol tájirıbesin keıingi býynǵa úlgi etý – ýaqyt talaby. Jazylbek Qýanyshbaev atamyz sııaqty dańqty eńbek erleriniń kásibı sheberligin dáripteý arqyly jastardy aýyl sharýashylyǵyna tartýǵa, eńbekke qurmet sezimin qalyptastyrýǵa jáne osy salanyń bedelin arttyrýǵa yqpal etedi.
Jazylbek atamyzdyń taǵylymǵa toly ǵumyry men eseli eńbegi - búgingi jastar úshin adal eńbek pen tabandylyqtyń jarqyn úlgisi. Onyń mal sharýashylyǵyn damytý jolyndaǵy qajyrly eńbegi, kásipke degen súıispenshiligi men jaýapkershiligi qazirgi býynǵa úlken ónege beredi. Osyndaı eńbek adamdarynyń ómir jolyn nasıhattaý arqyly jastardyń atakásipke, ǵylymǵa qyzyǵýshylyǵyn arttyryp, qoı sharýashylyǵy salasyna jańa serpin berý - bizdiń mindetimiz! Dálirek aıtqanda, qoı sharýashylyǵy ǵylymı-zertteý ınstıtýtyn qurmaı, elimizde qoı sharýashylyǵyn damytý múmkin emes. Eldiń bolashaǵy - eńbeksúıgish, týǵan jerge janashyr jas urpaqtyń qolynda. Sondyqtan Jazylbek Qýanyshbaev murasy - tek ótkenniń tarıhy ǵana emes, aýyl sharýashylyǵyn damytýǵa baǵyt beretin, jastarǵa rýh pen jiger syılaıtyn biregeı ónege mektebi bolǵany aıtyldy.
Alqaly jıynda Qazaqstannyń eńbek sińirgen qaıratkeri Turlybek Doqdyrhan Jazylbek Qýanyshbaev týraly túsirilgen «Qazaqtyń qara shaly» atty derekti fılmin kópshilik nazaryna usyndy.
Konferensııada «dala akedemıginiń» elimizdiń qoı sharýashylyǵy salasyn damytýǵa qosqan úlesi týraly jasalǵan zertteýler kópshilik nazaryna usynylyp, sala mamandary tájirıbe almasyp, bolashaqtaǵy yntymaqtastyq baǵyttaryn aıqyndady.