La Lıga prezıdenti Haver Tebas Ispanııa fýtbolynda tóreshilerdiń jumysyn baǵalaý úshin kelesi maýsymnan bastap jasandy ıntellekt engiziletinin málimdedi, dep habarlaıdy Egemen.kz
«Biz tóreshilerdiń jumysyna jasandy ıntellekt engizgeli otyrmyz. Eki negizgi baǵyt júzege asady. Birinshisi – tóreshilerdiń jumysyn baǵalaý. Ár matchtan keıin tóreshilerdiń tehnıkalyq komıteti (CTA) tóreshiliktiń ár qyryn baǵalaıtyn baqylaýshylardy qoldanady. Barlyǵy 30 túrli krıterıı bar. Qazir bul jumysty adamdar atqarady: 20 tóreshige 30 baqylaýshy bekitilgen. JI kómegimen biz sheshimderdiń kem degende 40%-yn obektıvti túrde qabyldaýǵa múmkindik beretin qural jasap jatyrmyz. Barlyq matchtardyń negizinde júıe túzilip, algorıtmder qalyptasady», – deıdi Haver Tebas.
Onyń aıtýynsha, JI bárin taldap, tóreshiniń qaı tusta durys bolǵan, bolmaǵanyn kórsetedi.
«Biz prosesti barynsha obektıvti etemiz. Sonymen qatar, bul tóreshilerdi matchtarǵa taǵaıyndaýmen tyǵyz baılanysty bolady. Komıtetke JI kómegimen oıynǵa úsh tóreshiniń kandıdatýrasy usynylady. Men adam ıntellektisine senemin, biraq keıbir jaǵdaılarda JI kómektesýi kerek», – deıdi maman.
Marca málimetinshe, jasandy ıntellekt belgili bir parametrler boıynsha ár matchqa eki nemese úsh tóreshini usynatyn bolady. Biraq sońǵy sheshimdi adam qabyldaıdy. Iаǵnı, JI óz betinshe tóreshilerdi taǵaıyndamaıdy.
Aıta keteıik, JI tóreshilik júıesin basqa sport túrlerinde de ózgertip jatyr. Tennıste Hawk-Eye tehnologııasy doptyń túsken jerin dál anyqtap, ATP-ǵa shetki tóreshilerden bas tartýǵa múmkindik bermek. Basketbol men beısbolda JI fol men straık-zonany anyqtaýǵa kómektesedi. Alaıda sýbektıvti sheshimder úshin adam tóreshiler qajet. Bul mysaldar JI-diń obektıvti tapsyrmalarda tıimdi ekenin kórsetedi. Biraq fýtbol sııaqty dınamıkalyq ári emosııaǵa toly sportta kúrdeli tásil qajet.
JI fýtbol tóreshiligin jetildirýde dáldik pen obektıvtilikti qamtamasyz etýge múmkindik beredi. VAR syndy qazirgi tehnologııalar sheshimderdiń dáldigin 94-99%-ǵa deıin arttyrdy.
Aıta keteıik, La Lıganyń 25/26 maýsymyndaǵy qorytyndy boıynsha «Barselona» merziminen buryn chempıony atynyp otyr. Ispanııa chempıonatynyń maýsymy 26 mamyrda aıaqtalady.