Qorǵanys mınıstriniń birinshi orynbasary – Bas shtab bastyǵy general-leıtenant Qanysh Ábýbákirov jumys sapary barysynda basqarý organdarynyń, quramalar men áskerı bólimderdiń jaýyngerlik daıarlyqtyń jańa júıesine kóshýge daıyndyǵyn baǵalady, dep habarlaıdy Egemen.kz
Abaı, О́skemen, Úsharal jáne Aıagóz garnızondaryndaǵy quramalar men bólimderde Bas shtabtyń mobıldi toptary jańa oqý baǵdarlamalary men jalpyáskerı pánder boıynsha jańartylǵan normatıvterdi eskere otyryp, jaýyngerlik daıyndyqty uıymdastyrý tártibin zerdeledi.
Jaýyngerlik daıyndyq departamenti men Serjanttar quramymen jumys basqarmasynyń ókilderi áskerı nysandardyń, oqý korpýstarynyń, atys alańdary men polıgondardyń jaı-kúıin tekserdi. Zymyran-artıllerııalyq qarý-jaraq qoımalaryn tekserý barysynda olar kúzet rejımin, qaýipsizdik sharalarynyń uıymdastyrylýyn, órtke jáne dıversııaǵa qarsy qorǵanys júıesin zerdeledi. Áskerler qyzmetin uıymdastyrý, qyzmet ótkerý oryndarynyń tehnıkalyq jabdyqtalýy jáne nysandardy kúzet quraldarymen qamtamasyz etý máselelerine erekshe nazar aýdaryldy.
Vedomstvoaralyq top jas sarbazdardy beıimdeý men oqytý jumystaryn jan-jaqty qarastyrdy. Salalyq mamandar kazarma qorynyń jaǵdaıyn, medısınalyq qamtamasyz etý deńgeıin jáne monsha-kir jýý qyzmetiniń uıymdastyrylýyn tekserdi. Sonymen qatar oqý-jattyǵý nysandarynyń jabdyqtalýy men jumys isteý máseleleri jeke qaraldy. Jeke quramnyń moraldyq-psıhologııalyq ahýalyn taldaý maqsatynda jas sarbazdar arasynda anonımdi saýalnama júrgizildi.
Saýalnama qorytyndysy boıynsha general-leıtenant Qanysh Ábýbákirov komandırlerdiń jeke qurammen júrgizetin derbes jumysynyń rólin kúsheıtý, problemalyq máselelerdi der kezinde anyqtap, sheshý jóninde birqatar tapsyrma berdi.
Bas shtab bastyǵy áskerı tehnıkalarǵa maýsymdyq qyzmet kórsetýdi sapaly júrgizýdiń mańyzdylyǵyna nazar aýdaryp, tehnıkalardy jazǵy paıdalaný rejımine kóshirý kezinde úzdik nátıje kórsetken sarbazdarǵa alǵysyn bildirdi.
Sapar aıasynda ortalyq apparat ókilderi garnızondardyń áskerı qyzmetshilerimen kezdesýler ótkizdi. Sondaı-aq áskerı bólimderdiń laýazymdy tulǵalaryna ádistemelik sabaqtar uıymdastyrylyp, «Bes qarý» baǵdarlamalyq modýlinde jaýyngerlik jáne dene daıarlyǵy boıynsha eseptilik júrgizý tártibi, qyzmettik qujattamany rásimdeý talaptary túsindirildi.
Jumys saparynyń qorytyndysy boıynsha general-leıtenant Qanysh Ábýbákirov jańartylǵan oqý baǵdarlamalaryn engizý, sıfrlandyrý júıelerin damytý, oqý-materıaldyq bazany jetildirý, qarý-jaraqtyń, áskerı tehnıkanyń jáne ınfraqurylym nysandarynyń tıisti tehnıkalyq jaı-kúıin qamtamasyz etý jóninde birqatar tapsyrmalar berdi. Sonymen qatar qaýipsizdik sharalaryn kúsheıtý, qyzmet jaǵdaılaryn jaqsartý jáne jeke quramdy jan-jaqty qamtamasyz etý sapasyn arttyrý mindetteri qoıyldy.