Brıtan ǵalymdary jasaǵan synaq raktiń denege taralýyn 75% azaıtty

SPL

Janýarlarǵa jasalǵan synaq nátıjesinde qaterli isiktiń denege taraý kórsetkishi tórtten úshke azaıdy. Bul týraly BBC basylymy Nature jýrnalynda jarııalanǵan zertteý nátıjelerine silteme jasap habarlady. Bul syrqattan kóz jumatyndardyń ólimine 90 paıyz jaǵdaıda isiktiń aǵzaǵa jaıylýy sebep bolady. Jańa zertteýler tyshqandardyń ımmýndyq júıesine engizilgen ózgerister qaterli isik aýrýynyń ókpede taraýyn báseńdetken. Brıtanııa Qaterli isik zertteý ınstıtýty erterekte jasalǵan zertteýdiń qorytyndysymen bólisip, qaterli isiktiń qalaı taraıtyny men onyń emi týraly tyń málimetter usyndy. Qaterli isiktiń taraýy ǵylymda "metastaza" dep atalady. Qarapaıym tilmen aıtsaq, metastaza degenimiz tez taralyp jatqan isik pen aǵza arasyndaǵy kúres. Kembrıdj Sanger ınstıtýty ǵalymdary isiktiń denege taraýyna ne túrtki bolatynyna zertteý jasaǵan. Olar qaterli isiktiń taralýyna qarsy kúreske qandaı DNQ-lar qatysatynyn bilý úshin genetıkalyq túrlendirilgen 810 tyshqandy synaqqa alǵan. Aldymen ǵalymdar tyshqandarǵa teri isik aýrýyn egip, sodan soń isik aýrýynyń olardyń ókpesine taralýyn baqylady. Nátıjesinde, synaq tyshqandardyń kópshiliginiń ımmýndyq júıesi myqtylyǵyn baıqatyp, Spns2 atalatyn bir gen teridegi isik aýrýynyń ókpege ótý múmkindigin tórtten úshke deıin qysqartqan. "Bul ókpedegi ımmýndyq júıeniń kúshtiliginen," - deıdi zertteý tobynyń múshesi Doktor Devıd Adams. - Keı aǵzalarda ımmýndyq júıe qaterli isik aýrýynan basym túsedi». Keı adamdarda dári-dármek isik aýrýyn emdeýde álsizdik tanytyp jatqanymen, keı aǵzalarda qaterli isik aýrýy ózinen ózi joǵalyp ketip jatatyn kórinedi. Brıtanııa Qaterli isik aýrýyn zertteý ortalyǵy mamany Doktor Djastın Alfordtyń aıtýynsha, joǵaryda atalǵan zertteý aldaǵy ýaqytta qaterli isikti emdeý jolyn kórsete alady.