Parlament Senatynyń depýtaty Darhan Káletaev «Nur Otan» partııasynyń Astanadaǵy respýblıkalyq qoǵamdyq qabyldaý bólmesinde azamattardy qabyldady.
Kezdesýge Astana qalasy men Aqmola oblysynan ártúrli áleýmettik máseleler tolǵandyrǵan turǵyndar keldi. Depýtatqa kelgenderdiń kópshiligi turǵyn úımen jáne jer ýchaskesimen qamtamasyz etýge qatysty máselelermen qaıyrylǵan bolatyn. Kelýshilerdiń ishindegi zeınetkerler men kóp balaly otbasylardyń ókilderi eńbekke ornalastyrý, zeınetaqymen qamtamasyz etý, áleýmettik járdemaqy taǵaıyndaý jáne qalany kórkeıtý máselelerin sheshýge kómek surady. Senator D.Káletaev barlyq máselelerdiń sheshilýin jeke baqylaýyna alatyn boldy.
D.Káletaev azamattardy ýaqytsha tirkeý jaǵdaıyna baılanysty túsinik berdi. Senator zańnyń qabyldanýy qajetti shara ekenin atap kórsetti. «Ýaqytsha tirkeý týraly zań erejeleri qabyldandy jáne onyń kúshi toqtatylmaıdy. Bul erejeler jeke bireýdiń tilek-qalaýy boıynsha qabyldanǵan joq, ýaqyt talabynan týyndap otyrǵan amalsyzdan qabyldanǵan shara. Ony iske asyrýda halyqqa qyzmet kórsetý ortalyqtary men Ishki ister mınıstrligi jumystarynda birqatar uıymdastyrý sharalary qabyldanýy tıis ekeni ekinshi másele. Munda Ishki ister mınıstrligin kináli qylýdyń keregi joq, oǵan barlyq memlekettik organdar atsalysýy tıis. Túsindirý jumystarynyń durys júrgizilmeýinen dúrligý bastalyp ketti», – dedi depýtat.
Álısultan QULANBAI,
«Egemen Qazaqstan»
ASTANA