Keshe Premer-Mınıstrdiń orynbasary Imanǵalı Tasmaǵambetovtiń tóraǵalyǵymen «Qazaqstandaǵy SOS balalar aýyly» korporatıvtik qoryna qoldaý kórsetý máselesi boıynsha selektorlyq keńes ótti. Keńes jumysyna «Qazaqstandaǵy SOS balalar aýyly» korporatıvtik qory qamqorshylyq keńesiniń tóraǵasy Serik Seıdýmanov, Almaty, Astana jáne Qaraǵandy oblystary ákimderiniń orynbasarlary qatysty.
Bıylǵy jyly «Qazaqstandaǵy SOS balalar aýylyna» 20 jyl tolady. Alǵashqy otbasylyq balalar úıi 90-shy jyldary quryldy.
Bıyldan bastap Temirtaý qalasyndaǵy SOS balalar aýylyndaǵy ata-anasynyń qaraýynsyz qalǵan balalar men jetimderdi 100 paıyz qarjylandyrý júzege asyrylýda. Al, Almaty qalasynda balalar aýylyn jergilikti bıýdjetten qarjylandyrý úshin ákimdik onyń menshik formasyn ózgertý qajet dep sanaıdy.
Buǵan deıin SOS balalar aýylyndaǵy ata-anasynyń qaraýynsyz qalǵan balalar men jetim balalardy 100 paıyz memleket esebinen qarjylandyrý máselesi kóterilgen edi. Nátıjesinde, 2015 jyly jergilikti atqarýshy organdarǵa 2020 jylǵa qaraı birtindep SOS balalar aýylyndaǵy ata-anasynyń qaraýynsyz qalǵan balalar men jetim balalardy kútýdi tolyq qarjylandyrýdy qamtamasyz etý usynyldy.
Keńes qorytyndysy boıynsha vıse-premer I. Tasmaǵambetov Astana, Almaty qalalary men Qaraǵandy oblysy ákimdikterine «Qazaqstandaǵy SOS balalar aýyly» korporatıvtik qorynyń 20 jyldyǵyn ótkizý jáne daıyndaýǵa qoldaý kórsetýdi tapsyrdy.
Sondaı-aq, 2020 jylǵa deıin SOS balalar aýyldaryndaǵy jetim balalar men ata-analarynyń qamqorlyǵynsyz qalǵan balalardy kútip-baǵýdy tolyq memlekettik qarjylandyrýǵa kezeń-kezeńmen kóshirý jáne tıisti jumystar júrgizý qajettigin atady.
Sonymen qatar, balalar úıleri tárbıelenýshileriniń otbasynda ómir súrý jáne tárbıelený quqyǵyn tolyq iske asyrýǵa múmkindik beretin balalar úıleriniń tárbıelenýshilerin ornalastyrýdyń «balany qabyldaıtyn otbasy» jańa nysanyn engizý, sondaı-aq, balalar aýyldarynyń nysanyn qıyn ómir jaǵdaıyndaǵy balalardy qoldaý ortalyqtary retinde qaıta qurýdy qarastyrý usynyldy, dep habarlady Premer-Mınıstrdiń resmı saıty.