Munaıly aımaqta vırtýaldy ken orny zerthanasy ashyldy. Atyraý munaı jáne gaz ýnıversıtetinde tanystyrylymy ótken jobanyń jalpy quny 74 mıllıon teńge turady. Qazirgi zamanǵy qural-jabdyqtarmen qamtylǵan zerthanada endi stýdentter aýdıtorlyq, dáris berý, qashyqtyqtan oqytý jáne 3D arqyly tájirıbelik sabaqtardan ótedi. Naqtyraq aıtsaq, úırenýshi arnaıy pýlt arqyly ózi tańdaǵan orynǵa baryp, qyzyqtyrǵan zatymen tanysady. О́tken taqyryp boıynsha tapsyrmany oryndaǵan soń, kelesi kezeńdegi vırtýaldy stendterge baryp, óz qolymen tájirıbe jasap kóredi. Jańa júıeniń taǵy bir artyqshylyǵy – stýdentter ken ornyn izdep tabýdan bastap, uńǵymalardy barlaý men joıýǵa deıingi jumystardyń bárin retteıdi, tehnologııalyq prosesterdi júrgizedi.
Údemeli ındýstrııalyq-ınnovasııalyq damý baǵdarlamasy úshin elimizdegi 11 joǵary oqý orny maman daıyndaıdy. Solardyń arasynan alǵash bolyp vırtýaldy ken ornyna atyraýlyq stýdentter qol jetkizdi. Zamanaýı zerthanada tek stýdentter ǵana emes, aımaqtaǵy munaı-gaz mekemelerinde qyzmet etetin jumysshylar da biliktilikterin jetildire alady.
Atyraý munaı jáne gaz ýnıversıtetiniń kafedra meńgerýshisi Nurlybek Shuǵaepovtyń aıtýynsha, zerthanada stýdentter ekinshi kýrstan bastap oqıdy. Barlyq mindetterdi jaqsy oryndaǵandar dýaldy oqytý júıesine kóshedi, ıaǵnı ár aıdyń birinshi jartysynda ýnıversıtette dáris alsa, ekinshi jartysynda kásiporyndarda eńbek etedi. Bul ádis – joǵary oqý ornyn aıaqtaǵan stýdenttiń daıyn maman bolyp shyǵýyna jasalǵan úlken múmkindik.
Baqytgúl BABASh,
«Egemen Qazaqstan»
ATYRAÝ