«Damý» qory Kepildeme berý quralyn paıdala otyryp eń kóp nesıe bergen banktiń úzdik menedjerlerin marapattady. Sonymen qatar, aımaqtyq fılıaldarda kepildeme berý shartyn jasaýda belsendilik tanytqan óz qyzmetkerlerin de marapattady, dep habarlaıdy Bnews.kz.
Baıqaý 2016 jyldyń qorytyndy kórsetkishteri boıynsha ótkizildi. Oǵan Qazaqstannyń barlyq oblysy men Almaty, Astana qalalarynan 436 qyzmetker jáne «Damý» qorynyń aımaqtyq fılıaldarynan 83 menedjer qatysty.
«Bıylǵy III baıqaýdyń aıasy keńeıgen. Baǵalaý barysynda nesıeniń qarjy kózi de esepke alyndy. Iаǵnı, bul «Damý» qory bólgen qarjy ma, álde banktiń baıqaýǵa qatysý balyn kótere túsetin óz qarjysy ma degen tustar da eskerildi. Biz kepildik berýde jyldam sheshim shyǵarý, aýyldyq jerlerdegi jobalarǵa qoldaý, «Damý» qorynyń kepildigimen bankte jeke qyzmet túrin qurý sekildi opsııalardy da engizdik. Bul jaǵdaıda bank óz klıentteri úshin óz qyzmet túrin engizýi kerek. Biraq «Damý» qorynyń kepildeme berý quralyn paıdalaný mindetti. Buǵan deıingi baıqaýlarda kepildeme berý sharty sany men baıqaýǵa qatysýshynyń qorjynynda qaıtpaı qalǵan nesıeler bolmaýy basty talap bolatyn», - deıdi «Damý» qory Basqarma tóraǵasynyń mindetin atqarýshy Mıras Beısembaev.
2016 jyly «Damý» qory 1 182 jobaǵa kepildik bergen. Olardyń 951-imen shartqa qol qoıylǵan. 2016 jyly «Damý» qorynyń kepildemesimen berilgen nesıe kólemi 26,9 mlrd teńgeni qurasa, kepildeme somasy 11,9 mlrd teńge boldy.