QR Ulttyq ekonomıka mınıstri Tımýr Súleımenov Úkimet Ulttyq qor qarajatyn únemdeýge nege kóshkenin túsindirip berdi, dep habarlaıdy QazAqparat. Onyń aıtýynsha, 2016 jyldyń sońynda Ulttyq qordy basqarýdyń jańa tujyrymdamasy shyqty. Onda eki negizgi mindet aıqyndalǵan. Birinshisi, transfertti dollarmen esepteýdi doǵarý.
«Buryn transfert dollarmen esepeteletin, bul óz kezeginde valıýta baǵamynyń ózgerýi kezinde kóp kedergi keltirdi. Endi ol tek teńgemen esepeteledi», - dep túsindirdi ol.
Ekinshiden, transfertterdiń kólemin azaıtý kózdelgen. Bıylǵy 2,8 trln. teńgeden, 2020 jyly 2 trln teńgege deıin tómendetiledi. Aldaǵy úshjyldyq bıýdjette ol: 2018 jyly - 2,6 trln. teńge, 2019 - 2,3 trln. jáne 2020 - 2 trln. teńge kóleminde kórinis tabady.
«Osy oraıda zańdy suraq týyndaıdy: jetispeı turǵan qarajat qaıdan alynady. Bıýdjetti tolyqtyrýdyń basty kózi -qosymsha ekonomıkalyq belsendilik bolýy shart. Ony biz kóp kólemdi memlekettik baǵdarlamalar men salyq bazasyn keńeıtý negizinde júzege asyramyz. Memleket basshysy óziniń Joldaýynda atap ótken mindetterdiń biri - jeńildikterdi ońtaılandyrý. Tıimdi emes jáne qoǵam úshin óziniń paıdasyn joǵaltqan jeńildikter joıylady. Sonymen qatar salyqtyq ákimshilendirýdi jaqsartý josparlanǵan. Ulttyq qordan alynatyn transfertterdi qysqartý memlekettiń áleýmettik mindettemelerdi oryndaýyna esh kedergi keltirmeıtinin kórip otyrmyz», - deıdi mınıstr.
Onyń sózine qaraǵanda, salyqtyq bazany kásipkerliktiń belsendiligin arttyrýdyń negizinde qol jetkizý josparlanǵan. «Biz qarajatty salyq kólemin arttyrýdan emes, ekonomıkalyq belsendiliktiń arqasynda kóp túsiremiz», - dedi Súleımenov. Eske sala keteıik, N.Nazarbaev óziniń joldaýynda Ulttyq qor qarajatyn tıimdi paıdalanýdy tapsyrǵan bolatyn.