«Nurly jol» memlekettik baǵdarlamasynyń júzege asyrylýynyń arqasynda 2016 jyly 100 myńnan astam jumys orny ashyldy. Bul týraly QR Úkimeti otyrysynyń barysynda ulttyq ekonomıka mınıstri Tımýr Súleımenov aıtty, dep jazady primeminister.kz.
QR ulttyq ekonomıka mınıstri T. Súleımenov óziniń jyl saıynǵy Qazaqstan halqyna arnaǵan Joldaýynda Memleket basshysy «Nurly jol» memlekettik baǵdarlamasyna oń baǵasyn bergenin baıandady. Búginde baǵdarlama avtojol, turǵyn úı qurylystaryna, sonymen qatar áleýmettik salaǵa zor serpin bergen ekonomıkalyq ósimniń negizgi lokomotıvi bolyp tabylady.
«Nurly jol» memlekettik baǵdarlamasynyń aıasynda 2016 jyly 100 myńnan astam jumys orny ashyldy. Jyl qorytyndylary boıynsha maqsatty transfertterdiń 469,6 mlrd teńgesi nemese 99% ıgerildi. Tolyq ıgerilmeý jaıttary negizinen memlekettik satyp alýlar boıynsha únemdeýlermen baılanysty.
Kólik joldary salasyn damytýǵa 2016 jyly 151,3 mlrd teńge bólingen, qarajat tolyq ıgerildi. Bólingen qarajat esebinen 611 shaqyrym avtojolda qurylys-jol jumystary aıaqtaldy. Nátıjesinde Astana – Temirtaý, Almaty – Qapshaǵaı, Astana – Petropavl baǵyttary boıynsha kólik qozǵalysy ashyldy. Bıyl bul baǵyttaǵy jumystar jalǵastyrylady.
Logıstıkalyq ınfraqurylymdy damytýǵa 56,4 mlrd teńge bólindi, ony kvazımemlekettik sektor tolyq ıgerdi.
Máselen, bólingen qarajat Astana áýejaıynyń jańa termınalynyń, ishki ınjenerlik jelilerdiń qurylys-montajdaý jáne árleý jumystaryn aıaqtaýǵa, sonymen qatar tehnologııalyq jabdyqty jetkizýdi qamtamasyz etýge múmkindik berdi. Sonymen qatar ótken jyly Indýstrııalandyrý kúni aıasynda Memleket basshysy «QTJ UK» AQ júzege asyratyn eń iri nysandardyń iske qosylýyna ruqsat berdi. Onda Almaty-Shý ýchaskesinde ekinshi temirjol joldarynyń jáne Quryq portyndaǵy parom ótkeliniń qurylysy qamtylmaq, bul Qazaqstannyń eksporttyq-tranzıttik áleýetine oń yqpalyn tıgizip, Eýropa jáne Taıaý Shyǵys elderine shyǵýyna jol ashady.
Sonymen qatar elimizdiń barlyq aımaqtarynda turǵyn úı qurylysy nysandaryna kommýnıkasııalyq ınfraqurylym júrgizilýde, 2 208 shaqyrym ınjenerlik jelileri salyndy. Sondaı-aq «BJK 2020» aıasynda kásipkerlik nysandaryna jetkiliksiz ınfraqurylymdy júrgizý boıynsha jumystar jalǵastyrylýda. 2016 jyly 35 bıýdjettik ınvestısııalyq jobalardy júzege asyrýǵa 77 ShOB sýbektilerine ınfraqurylym júrgizildi.
Memlekettik baǵdarlama aıasynda bilim berý salasynda ınfraqurylymdy damytýǵa erekshe kóńil bólingen, atap aıtqanda 2018 jylǵa qaraı apatty jáne úsh aýysymda oqytatyn mektepterdi tolyq joıý kózdelgen. Qazir 52 nysan paıdalanýǵa berildi, onyń ishinde 35 mektep pen 17 balabaqsha bar.