Almatyda kardıologııa, endokrınologııa, gastroenterologııa, nefrologııa men sabaqtas salalardaǵy jetekshi mamandardy biriktirgen «Ulttyq metabolıkalyq kod 2026» ǵylymı-praktıkalyq konferensııasy ótip, onyń semizdik, 2 tıpti qant dıabeti, arterııalyq gıpertenzııanyń júrek-qantamyr men gastroenterologııalyq aýrýlarǵa áseri talqylandy, dep jazady Egemen.kz.
S.Asfendııarov atyndaǵy Qazaq ulttyq medısına ýnıversıteti, Kardıologııa jáne ishki aýrýlar ǴZI, sondaı-aq beıindi kásibı qaýymdastyqtar uıytqy bolǵan jıynda QazUMÝ rektory Marat Shoranov: «Qazaqstandaǵy árbir úshinshi-tórtinshi eresek turǵyn metabolıkalyq buzylys belgilerine ıe jáne bul jastar arasynda da jıi anyqtalyp otyr. Sonymen qatar oń úderister de baıqalady, máselen profılaktıkalyq tekserýler artty. Aýrýlardy asqyndyrmaı anyqtaý algorıtmderi jetildirilip, medısınalyq kómektiń preventıvti baǵyty kúsheıip keledi», deıdi.
Kardıologııa jáne ishki aýrýlar ǴZI Basqarma tóraǵasy Rústem Tóleýtaev qazirgi tańda metabolıkalyq sındrom nozologııalyq anyqtamalar sheńberinen shyǵyp, júrek-qantamyr, endokrındik, gastroenterologııalyq aýrýlardyń negizgi qaýip faktorlaryn biriktiretin tutas patogenetıkalyq tujyrymdamaǵa aınalǵanyna atap toqtaldy.
Densaýlyq saqtaý salasyndaǵy serpin: Elimizde náreste ólimi aıtarlyqtaı tómendedi
Rústem Tóleýtaev 2021-2025 jyldary medısınalyq-sanıtarııalyq alǵashqy kómek deńgeıinde júrgizilgen skrınıngtik baǵdarlamalar nátıjesinde qamtý 15-20%-ǵa artqanyn, al qaýip faktorlaryn erte kezeńde anyqtaý kórsetkishi óskenin atap ótti. Demek, bul dıagnostıka men medısınalyq kómektiń qoljetimdiliginiń jaqsarǵanyn kórsetedi. Osyǵan baılanysty Qazaqstanda profılaktıkalyq baǵdarlamalardy kúsheıtý, gastroenterologııa, endokrınologııa, kardıologııa men nefrologııany ıntegrasııalaý, sondaı-aq táýekelderdi baǵalaýdyń sıfrlyq quraldaryn engizý basym baǵyttarǵa aınalyp keledi.
Konferensııaǵa Fransııanyń Bas konsýly Maksım Jerenje men Fransııa elshiliginiń densaýlyq saqtaý jónindegi mamany Aleksandra Tırkıýır qatysyp, Arterııalyq gıpertonııa jáne kardıovaskýlıarlyq profılaktıka jónindegi mamandar qoǵamy men «Serve Qazaqstan» JShS arasynda júrek-qantamyr aýrýlarynyń aldyn alý men baqylaý tıimdiligin arttyrýǵa baǵyttalǵan Yntymaqtastyq týraly memorandýmǵa qol qoıyldy. Bul bastama Densaýlyq saqtaý mınıstrligi men «Serve» kompanııasy arasyndaǵy mámile arqyly júzege asyp jatyr.
BUU: Densaýlyq saqtaýǵa ınvestısııa salynbasa, budan da joıqyn pandemııaǵa tap bolamyz
Konferensııa barysynda pánaralyq ózara is-qımyl men kardıometabolıkalyq buzylystary bar pasıentterdi basqarýdyń zamanaýı strategııalaryn engizýge erekshe nazar aýdaryldy.
Sonymen qatar Qazaqstannyń tanymal sarapshylary men Eýropadan kelgen halyqaralyq mamandar, qatysýshylar jańa klınıkalyq usynymdardy, zamanaýı terapııalyq tásilderdi jáne ózekti zertteýler nátıjelerin talqylady.
Alǵash ret qatysýshylarǵa kardıometabolıkalyq táýekelderdi baǵalaý jáne túzetý boıynsha derbestendirilgen usynymdary bar metabolıkalyq pasport alý múmkindigi usynyldy.