Qyzylorda qalasyndaǵy turǵyn úılerdiń birinde órt shyǵyp, jalyn tórtinshi qabattaǵy páterdiń balkonynan taraǵan, dep jazady Egemen.kz.
Oqıǵa ornyna jaqyn jerde bolǵan polısııa qyzmetkerleri Qaısar Mamadalıev, Rýslan Baýrjanuly, Nurjan Naǵashybaı dereý órt shyqqan jerge bet alyp, órt sóndirýshilerdiń kelýin kútpeı-aq páterdegi jalyndy sóndirýge kirisken.
Sondaı-aq olar páterde uıyqtap jatqan eki balany oıatyp, qaýipti aımaqtan alyp shyqqan. Osylaısha polıseılerdiń batyl qadamynyń arqasynda qaıǵyly jaǵdaıdyń aldy alynyp, balalar qutqarylǵan. Keıin oqıǵa ornyna qosymsha kúshter men tótenshe qyzmetter kelip, jaǵdaı tolyq baqylaýǵa alynǵan.
Aıta keteıik, 13 sáýir keshki saǵat shamamen 21:27-de Astanada kópqabatty úıden órt shyǵyp, balalar qutqaryldy. Sondaı-aq 12 sáýirge qaraǵan túni Astananyń Esil aýdany Túrkistan kóshesinde ornalasqan 21 qabatty turǵyn úıdiń 15-qabatyndaǵy páterden órt shyǵyp, 3 balanyń máıiti tabyldy. Olardyń anasy aýrýhanaǵa jetkizilgen edi. Dárigerler 39 jastaǵy áıeldiń jaǵdaıynyń aýyr ekenin málimdedi.