Dáýir bıiginen tabylǵan basshy

Irgeli el atanyp, babalarymyz ǵasyr­lar boıy ańsaǵan táýelsizdikke qol jetkizgenimizge bıyl jıyrma jyl. 28 qań­tardaǵy kezekti Joldaýynda Elbasy N.Á.Nazarbaev: «Bıyl – biz úshin erekshe qasterli jyl. Biz el táýelsizdiginiń 20 jyldyǵyna qadam bastyq. Bodan jurtty búgingideı bostan kúnge jetkizgen bul jolda biz bıik belesterdi baǵyn­dyr­dyq», dep atap kórsetti. Shyndyǵynda da osy jyldar ishinde kóp nársege qol jetkizip úlgerdik. Búginde Qazaqstandy búkil álem jurtshylyǵy keńinen tanyp bile bastasa, ol respýblıkamyzdyń Prezıdenti N.Á. Nazarbaevtyń shetelderdegi jáne dúnıe­júzi­lik qaýymdastyqtar al­dyn­daǵy bede­liniń, zor abyroıynyń ar­qa­sy dep bilýimiz kerek. Temirtaýdaǵy ozat jas jumysshy Nursultan Nazarbaev Búkilodaqtyq Lenın komsomoly Ortalyq Komıtetiniń múshesinen Qazaq KSR Mınıstrler Ke­ńesi­niń Tóraǵasyna deıingi qyzmetterde júrgen jyldarynda óz boıyndaǵy jańa­lyqty meılinshe jyldam qabyldaı biletin aıryqsha darynymen, sheber uıym­dastyrýshylyq qabiletimen, tereń kemel saıasatkerligimen respýblıkamyzǵa ǵana emes, búkil Odaq kólemine tanyla bildi. Kezinde memleket jáne qoǵam qaıratkeri Dinmuhamed Ahmetuly Qonaev oraıly bir sátinde: «Nazarbaevty Mınıstrler Keńesiniń Tóraǵasy qyzmetine usynǵa­nym­da úlken mindet artqan edim, al onyń daryn-qabileti meniń kútkenimnen de artyq bolyp shyqty», dep jumysyna qatty súısinetinin, rıza ekendigin bildiripti. Elimiz egemendik alǵan jyldar ishinde júzege asqan eń úlken mindet qandaı desek, birinshi kezekte Prezıdentimizdiń tikeleı bastamashyldyǵymen astananyń kóshirilýi oıǵa oralady. Bul halqymyzdyń bolashaǵy úshin eleýli ról atqaratyn óte zor saıası máni bar is. Birinshiden, Otanymyzdyń bas qalasyn Qazaqstannyń ortalyǵyna ákelý arqyly keń-baıtaq elimizdi ortalyqtan basqarý múmkindigi ulǵaıdy. Ekinshiden, respýblıkanyń soltústigi men ortalyǵyna jergilikti ult ókilderiniń kóptep shoǵyr­lanýyna barynsha jaǵdaı jasaldy. Úshin­shi­den, osy ýaqyttarǵa deıin bizde jalǵyz Almatydan ózge aýyz toltyryp aıtar­lyq­taı ásem de iri qalamyzdyń bolmaǵany anyq. Búginde elorda qurylysynyń el ekonomıkasyn alǵa bastyrýǵa da úlken septigin tıgizip otyrǵanyn aıta ketý qajet. Sol arqyly qalada kóptep jańa jumys oryndary ashyldy, qurylys ındýstrııasy jaqsy qarqyn aldy. Shyn máninde Astananyń órkendeýi Qazaqstannyń ór­kendeýine ulasty. Keshegi aǵa urpaqtardyń salyp ketken jolymen júrip, sony alǵa qaraı damytý, ómir jańalyǵyn eskerý, kóne men jańany ushtastyrý – Qazaqstan halqynyń mindeti. Eldiń táýelsizdigi kóp nársege oı saldy­ra­dy. Munda tarıhı sanany oıatý, joǵal­ǵa­nyn ózine qaıtarý, órleý dáýirine jol ashý degen maǵyna, sondyqtan qazaq­standyq patrıottyq tárbıe degen uǵym tek qana aıtyla salatyn dereksiz uǵym emes. Ol eń aldymen naqty, óz ultyna, sonda turyp jatqan halyqtarǵa berilgen, adal eńbek ete alatyn, jalpy halyqtyq, áleýmettik má­denıetti túsinip, biletin sonyń nusq­alaryn óz halqynyń qajetine jarata alatyn, bas­qalary túsine biletin naǵyz adam súıgish­tik, qazaq­standyq patrıottyq rýhtaǵy belsendi adamdardy tárbıeleý úshin kerek. Bizdi álemge moıyndatqan uly kúsh – yntymaq pen birlik. Sebebi, tatýlyq tetigi Qazaqstanda berik saqtalǵan. Bizdiń Qazaq eli jahanǵa yntymaqtyń uıasy retinde ta­nyldy. Elimizdiń Eýropa tórine shyǵýy – memleketimizdegi toleranttylyqtyń jo­ǵa­ry deńgeıge kóterilýiniń arqasy, eldegi ty­nyshtyq pen dinder arasyndaǵy tatý-tát­ti­liktiń nátıjesi. Sebebi, memlekettik saıa­satymyz, zańdarymyz osy yntymaq pen birlikti saqtaýǵa baǵyt­tal­ǵan. Eń birinshi qundylyǵymyz – adam­nyń ómiri men bos­tandyǵy. Bizdiń ómir tanymymyz, konstı­týsııalyq quryly­my­myz – barly­ǵy tózim­dilik ıdeıasyna negizdelgen. Qazir Qazaq­standa dál osyn­daı qoǵam qalyp­tasýda. Yntymaq pen birlikti qýattaıtyn, barlyq etnos ókil­derin bir týdyń astyna biriktiretin qoǵam qalyptasyp otyr. Nursultan Ábishuly – álemniń asa iri memleket basshylary moıyndaǵan qazaq memleketiniń eń alǵashqy basshysy, dú­nıe júzine áıgili saıasatkerlerdiń biri. Ol – el basqarý isinde halyqtyń ǵasyrlar boıy jınaqtalǵan baı tájirıbesi men álemdik tájirıbeni tal boıyna toǵys­tyr­ǵan alym­dy da alǵyr basshy. El ómiriniń alýan sa­laly tirshilik-tynysyn tereń bilý, mań­daı tiregen problemalardyń eń eleýlisin tap basyp tanı alý, elishindik jáne álem­dik ahýaldarmen sanasa otyryp, urymtal áreketterge barý, sol jolda tańdalǵan baǵytyn tabandylyqpen júze­ge asyrý – Nursultan Ábishuly Nazar­baevtyń Memleket basshysy retindegi basty qasıeti. Qoǵamǵa eń keregi – eldiń erteńine degen senim men úmit. Qashannan beri el men jurtqa adaldyq bıiginen kóringen El­basy Nursultan Nazarbaevtyń júrgizip otyrǵan syrtqy jáne ishki saıasaty – órkenıettilikke nyq qadam basýdyń ózindik úlgisi dep sanaımyz. Nurǵalı JAQSYLYQBAEV, D.A. Qonaev atyndaǵy halyqaralyq qordyń basqarma múshesi. Almaty.