Byltyr Parıj Olımpıadasyna qatysqan jerlesimiz Muhamedsabyr Bazarbaıuly (70 kg) jastar arasyndaǵy álem birinshiliginiń jeńimpazy Abdýlázız Juraqulovty (О́zbekstan) oısyrata utty. Bul salmaqtaǵy Farýh Toqtasynov ta aýstrııalyq Arsen Chabıannan aılasyn asyrdy. Baǵlan Kenjebek (55 kg) Nıjat Hýseınovten (Ázerbaıjan), Tımýr Qabdeshov (55 kg) Petsı Djoıstan (Irlandııa), Nurmagomed Iýsýpov (90 kg) Konor Ýılıamsten (Ýels) basym tústi. Bekzat Aldamjarov (50 kg) Asylbek Jalılovten (О́zbekstan), Rýslan Kúzeýbaev (60 kg) Salım Ellıs-Beıten (AQSh), Beıbarys Jeksen (60 kg) Lýndaa Gantýmýrdan (Mońǵolııa), Dıas Moljigitov (80 kg) Robbı Gonsalesten (AQSh), Sanjaráli Begalıev (80 kg) Dos Santos Belnı Kaýeden (Brazılııa) jeńildi.
Elimizdiń eń ataqty erkin kúres sheberleri, álem chempıondary Rızabek Aıtmuhan men Nurqoja Qaıpanov sáýir aıynda Bishkekte jalaýy jelbireıtin Azııa chempıonatynan bosatyldy. Bul jaıynda ulttyq quramanyń bas bapkeri Danııar Qaısanov málimdedi. Onyń aıtýynsha, Qyrǵyzstan astanasynda el birinshiliginde daralanǵan balýandar baq synaıdy. Joǵaryda esimderi atalǵan komanda serkeleri bıyl kúzde Japonııanyń Aıchı-Nagoıa qalasynda alaýy tutanatyn Azııa oıyndarynda óner kórsetedi.
Almatynyń «Qaıraty» fýtzaldan Chempıondar lıgasy shırek fınalynyń alǵashqy oıynyn óz alańynda Ispanııanyń «Kartehenine» qarsy ótkizip, 1:2 esebimen ese jiberdi. Qarymta match eki aptadan keıin ótedi.
Fýtboldan ulttyq quramanyń bas bapkeri Talǵat Baısýfınov kómekshileriniń esimi belgili boldy. Jaýapty mindet Ivan Azovskıı, Marat Eslıamov, Eldos Ahmetov (bas bapkerdiń kómekshileri), Iýrıı Novıkov (qaqpashylar jattyqtyrýshysy), Muhtar Erimbetov (dene daıyndyǵy jónindegi jattyqtyrýshy) syndy mamandarǵa júktelip otyr.
Bul kúnderi Indonezııa astanasy – Djakartada semserlesýden jasóspirimder men jastar arasyndaǵy Azııa birinshiligi ótip jatyr. Jarystyń alǵashqy kúni ulttyq qurama qorjyny qos qolamen tolyqty. Jekelegen synda Aıbar Qaıym sheberligimen kózge tússe, Darıa Samodelkına, Sabına Serikova, Polına Lesovskaıa, Arına Namestnıkovalar komandalyq saıysta úzdik úshtikti túıindedi. Bir aıta keterligi, Darıa kúni keshe ǵana Italııada alaýy sóngen Olımpııa oıyndarynda mánerlep syrǵanaýshylardyń «TOP-10-dyǵy» qatarynan kóringen Sofıa Samodelkınanyń týǵan sińlisi.