Ultty saqtaýdyń eń tóte joly – urpaq tárbıesi. Bala oıynmen ósedi, damıdy, jetiledi. Qazirgi balalar atadan mura bolyp kele jatqan oıyndarymyzdy qanshalyqty biledi? Osy jáne basqa da saýaldarǵa Túrki áleminiń balalar oıyndary halyqaralyq festıvali jaýap berdi.
Ulttyq kıim kıgen balalar kóz tartady. Olardyń baıyrǵy oıyndardy berile oınap otyrǵanyn kórgende, janyńyz jadyraıdy. Osyndaı aýqymdy ári ıgi is-sharany Oqý-aǵartý mınıstrligi men Túrkııanyń Bilim mınıstrligi birlesip uıymdastyrdy.
Oqý-aǵartý mınıstrliginiń málimetinshe, 9–13 jas aralyǵyndaǵy oqýshylarǵa arnalǵan festıval túrki memleketteri arasyndaǵy mádenı yntymaqtastyqty nyǵaıtýǵa, túrkilerge ortaq baı murasyn, dástúrli balalar oıyndaryn saqtaýǵa, nasıhattaýǵa, sondaı-aq halyqaralyq pedagogıkalyq yntymaqtastyqty damytýǵa baǵyttalǵan. Sonymen qatar is-shara balalar oıyndaryn júıeleý, ortaq muraǵat qalyptastyrý, oıyndardyń bilim berý úderisindegi pedagogıkalyq rólin arttyrý, sondaı-aq jas urpaqtyń áleýmettik, emosıonaldyq ári mádenı damýyna qoldaý kórsetýdi kózdeıdi.
Festıval aıasynda elimizdiń 20 óńirinen kelgen pedagogterge arnalǵan halyqaralyq semınar-trenıng ótti. Qatysýshylar túrki halyqtarynyń dástúrli oıyndarymen tanysyp, olardy bilim berý úderisine engizý joldaryn talqylady. Semınar-trenıng baǵdarlamasynda asyq atý, taıaq tartý, láńgi tebý, oramal tastamaq, saqına salý, hantalapaı, tymaq urý, besasyq, taǵy basqa oıyn túrleri usynylǵan. Qorytyndysy boıynsha túrkııalyqtar qazaq mádenıetine tán birneshe oıyndy iriktep aldy. Bul oıyndar bıylǵy sáýir aıynda Ystanbul qalasynda ótetin túrki elderi festıvalinde kórsetiledi.