«Quttyqtaıdy qazaq eli, ul-qyzy!»

Elimizdiń bas saılaýy ótti. Uıymshyldyqpen ótken bul saılaýda halqymyz sanaly túrde óz qalaýlarymen elimizdiń Prezıdentin tańdap aldy. Men osy maqala arqyly qaıtadan Elbasy bop saılanǵan Nursultan Ábishulyn jáne de el azamattaryn tutas el bolyp bereke-birlikke betburys jasaǵan qadamdarymen quttyqtaǵym keledi. Mynaý álemde ótip jatqan dúrbeleń qozǵalystar kezeńinde uıymshyldyqpen, sanaly túsinistik­pen ótken bul saılaý qazaqstandyqtardyń azamattyq dárejesiniń kórsetkishindeı boldy. Saılaýǵa belsene qatysý elimizdiń eldiginiń, azamattary­myzdyń azamattyǵynyń kórsetkishi. Osy saılaý elimizdi eńselendire, biriktire, baýyrlastyra túsken sekildi. Birlik-berekemizdi arttyra túsken sekildi. Bul qubylystyń Qazaq eliniń bedelin álemge pash eteri aqıqat. Ár adamnyń saılaýǵa qatysýy óziniń osy el azamaty ekendigine degen seniminiń oıanýy! El bolashaǵy úshin óz úlesin qosýy. Men ózimiz daýys bergen saılaý ýchaskesindegi jaǵdaıǵa qarap, kórsetkishtiń óte joǵary bolǵandyǵyna kózim jetti. Keýdemdi qýanysh sezimi bıledi. Ortaq jeńisimiz qutty bolsyn, otandastar! Elimizdiń bereke-birligin óz qolymyzben, óz isimizben osylaı órkendete bereıik! Qurmetti Nursultan Ábishuly! Men Sizdi osy júrek-jardy ma­qala arqyly Elbasy bop qaıta saılanýyńyzben quttyqtap, «El amanaty» atty aýyr mindetti burynǵysha abyroımen at­qa­ra berýińizge shyn júrekten tilektes ekenimizdi bildirgimiz keledi. Elińizdiń de, ózińizdiń de jeńisińiz qutty bolǵaı, jemisti bolǵaı! Quttyqtaý retinde Sizge arnap jazǵan óleńimdi joldaımyn! Baıtaǵymnyń baqytyna jaralǵan – Tapqan uly qazekemniń bir qyzy! Qazaq aty Nursultan dep taralǵan, Bar álemge nur shashady juldyzy!   Baıtaq dalam jasyl baqqa bólendi, Jalǵyz aǵash orman eken, kórdik biz! Qamsyz elim, qamal salmaı qorǵaldy, Jalǵyz adam qorǵan eken, sezdik biz!   Az jurtyńdy teńestirgen Qytaımen Bir qazaqty myńǵa balap, ózińsiń! Utyp kelgen qarsylasty upaımen, Alla bergen qazaǵyma tózimsiń!   Eliń boljap bolashaǵyn Sizbenen, Quttyqtaıdy jeńisimen Jalǵyzyn! Urpaǵynan ulylyqty dámetip, Nurgúlim der, Nursultan der ul-qyzyn!   Maqtanamyz kisilikti sezinip, Qarap qaldy Eýropa aýzyma! Bolmaǵan baq qazaǵyma kezigip, Senim taptyq alatyndaı taý buza! Shańy shyqty, artta qalǵan jaıaýdyń, Úni shyqty arqańyzda jalǵyzdyń! Deıdi jurtyń, Táńir bergen, aıaýlym, Ǵaryshtan da elge sálem salǵyzdyń! Ár qadamyń qut ákelgeı elińe, Quttyqtaıdy Qazaq eli, ul-qyzy! Bılik aıtqan Eýrazııa tórinde, Jasa! Jasa! Qazaǵymnyń Jalǵyzy! Saıyn NAZARBEK, sáýletshi, aqyn, Qazaqstannyń  eńbek sińirgen qaıratkeri,  Shyǵys Qazaqstannyń Abaı aýdanynyń, Atyraýdaǵy Mahambet aýdanynyń qurmetti azamaty. Aqtaý.