Yntymaqtastyqqa yntaly

Qazaqstan Prezıdenti janyndaǵy Memlekettik basqarý akademııasynyń basshylyǵy elimizge arnaıy saparmen kelgen ulybrıtanııalyqtar Lester ýnıversıtetiniń rektory Pol Boılmen, Zań mektebiniń dırektory Fransýa De Býamen jáne Strategııalyq áriptestik jónindegi dırektor Maıkl Grınmen kezdesti. Jıynǵa «Astana» halyqaralyq qarjy ortalyǵynyń ókilderi de qatysty. Bul sapardyń maqsaty – brıtan quqyǵy negizinde jumys at­qa­ra­tyn «Astana» halyqaralyq qarjy orta­ly­ǵynyń kadrlyq rezervin daıarlaý jónindegi áriptestik múmkindikterin qarastyrý, brıtandyq mamandardyń kómegimen akademııa bazasynda aǵyl­shyn tili mektebin jáne Lester ýnı­versıtetiniń quqyq mektebi fılıal­yn ashý syndy mańyzdy jobalardy talqylaý. Bir atap óterligi, Lester ýnıversıtetine, sonymen q­a­tar, basqa da brıtandyq JOO-lar­ǵa oqýǵa tú­sýge ynta-nıet tanytyp otyr­­ǵan qazaqstandyq talapkerlerdiń daıyn­dy­­ǵyn kúsheıtýge Lester ýnı­versıteti úl­ken qyzyǵýshylyq tanytyp otyr eken. Jıynda sóz alǵan Memlekettik basqarý akademııasynyń rektory Fatıma Jaqypova qurylymnyń erek­she­ligi men artyqshylyǵyna toq­tal­dy. «Memlekettik basqarý akademııa­sy Qazaqstan Prezıdenti janyndaǵy jal­­ǵyz oqý-bilim jáne ıdeologııalyq ortalyq ispetti. Akademııa Qazaqstan­nyń jáne óńirimizdegi el­der­diń mem­­lekettik qyzmetshilerin oqy­ta­dy. Qazirgi tańda bizde Qazaqstan, Aýǵanstan, Qyrǵyzstan, Mońǵolııa já­­ne Tájikstan sekildi elder­diń 300-ge jýyq memlekettik qyzmetshisi dá­­ris alyp, biliktilikterin je­til­dirýde. Túlekterdiń arasynda Úki­met músheleri, oblystar men iri qalalardyń ákimderi, ulttyq kom­panııalardyń jetekshileri bar. Qazirgi tańda Memlekettik basqarý akademııasy el Prezıdentiniń birin­shi jáne besinshi ınstıtýttyq re­for­malarynyń, sondaı-aq, «100 naqty qa­dam» Ult josparynyń júzege asy­ry­lýyna belsendi atsalysýda, – dedi rektor. Sonymen qatar, Fatıma Jaqypova akademııa magıstratýranyń 5 jáne doktorantýranyń 4 baǵdarlamasy boı­ynsha oqý-bilim jumystaryn júr­gi­zetinin, jyl saıyn Qazaqstannyń 2 myńnan astam memlekettik qyz­met­shisi qaıta daıarlaý jáne kásibı bi­lik­tilikti arttyrý boıynsha qysqa mer­zimdi kýrstardan ótetinin jetkizdi. Onyń aıtýynsha, ótken jyly akademııa Reseıdiń 105 memlekettik qyzmetshisin oqyt­sa, bıyl da oqytý baǵdarlamasy boıynsha tapsyrys alypty. Al Lester ýnıversıtetiniń rektory Pol Boıl óz sózinde ýnıversıtettiń tarıhyna, qazirgi tynys-tirshiligine, oqytý júıesine jan-jaqty toqtalyp ótti. «Lester ýnıversıtetiniń negizi 1921 jyly qalanǵan. Times and The Sunday Times Good University Guide-2017 reıtıngisine sáıkes, Ulybrıtanııadaǵy 120 ýnıversıtettiń ishin­de bul joǵary oqý orny 25-orynda tur. Qazirgi tańda onda 20 myńǵa jýyq stýdent bilim alady. Olardyń 23 paıyzy álemniń 117 elinen kelgen shetel stýdentteri», – dedi P. Boıl. Kezdesýdiń qorytyndysy retinde Memlekettik basqarý akademııasy men Lester ýnıversıtetiniń arasynda О́zara túsinistik týraly memorandýmǵa qol qoıyldy. Láıla EDILQYZY, «Egemen Qazaqstan»