1 naýryz kúni Qyzylorda oblysyna Japonııanyń Qazaqstan Respýblıkasyndaǵy Tótenshe jáne О́kiletti Elshisi Itıro Kavabata jumys saparymen keldi. Ol oblys ákimi Qyrymbek Kósherbaevpen kezdesip, aımaqtaǵy birqatar áleýmettik nysandardy aralady.
Kezdesý barysynda Qyrymbek Kósherbaev Kavabata myrzaǵa Japonııa Úkimetiniń «Shóp tamyry» baǵdarlamasy boıynsha Syr óńiriniń medısına salasyn damytýdaǵy uzaq merzimdi áriptestigi úshin alǵysyn bildirdi.
- Táýelsizdik alǵannan beri Japonııa Úkimeti Qazaqstanda 5 487 468 AQSh dollaryna 75 qazaqstandyq jobany qarjylandyrdy. Onyń ishinde Qyzylorda oblysynyń densaýlyq saqtaý salasyn damytýǵa baǵyttalǵan birneshe joba bar. Alǵash ret 2000 jyly Qazaqstan men Japonııa Úkimetiniń kelisimderi nátıjesinde quny 3 mln. 800 myń dollar turatyn medısınalyq qural-jabdyq alýǵa grant bólinip, úlken joba júzege asty. 2003 jyly oblystyq balalar aýrýhanasy qural-jabdyqtarmen qamtamasyz etildi,- degen oblys ákimi Kavabata myrzaǵa alǵys hat tapsyrdy.
Qyzylordada Itıro Kavabata oblystyq juqpaly aýrýlar aýrýhanasynda bolyp, jan saqtaý bólimine 75 myń AQSh dollary turatyn jańa qural-jabdyqtar tapsyrdy. Budan bólek, Japonııa elshiligi balalar men jasóspirimderge arnalǵan týberkýlezge qarsy oblystyq sanatorııdi qoldaý boıynsha taǵy bir joba ázirleýde.