Erjan Shynkeev: Krpalekti jeńgenim – ózime-ózim sengenim

Almanııanyń Dıýsseldorf degen qalasynda dzıýdodan álemdik Gran-prı jarysynyń alǵashqy kezeńi ótti. Osy dúbirli dodada asa aýyr salmaq boıynsha (+100 kg) óner kórsetken Erjan Shynkeev Rıo-2016 Olımpıadasynyń chempıony Lýkash Krpalekti qola júlde úshin bolǵan beldesýde vazarı ádisimen jeńip, jankúıerlerine aıtyp jetkizgisiz qýanysh syılady. Qazirgi ýaqytta atalǵan qalada oqý-jattyǵý jıynynda júrgen apaıtós balýanmen telefon arqyly habarlasyp, oıda júrgen suraqtardyń birazyna jaý­ap alǵan edik. – Erjan balýan, jeńis qutty bolsyn! Osy týrnır­de Lýkash Krpalekke jet­kenge deıin kimdermen bel­destiń? – Alǵashqy beldesýim brazılııalyq balýan Rýan Iskýer­domen ótti. Ony jeńgen­nen keıin grýzın atleti, álem chempıonattarynyń júldegeri Adam Okrýashvılıdi vazarı ádisimen tize búktirdim. Al úshinshi ret tatamıge shyqqanda japon Hısaıoshı Harasavadan shıdo – eskertý boıynsha jeńilip qaldym. Jubanysh beldesýinde ýkraınalyq Iаkov Hammodan basym túsip, qola júlde úshin kúresýge múmkindik aldym. Al bul synda Lýkash Krpalekti vazarı ádisimen jeńdim. – Álem jáne Olımpıada oıyndarynyń chempıonyn jeńgeniń ózińe degen senim­dilikti arttyrǵan shy­ǵar? Jalpy, bul balýanmen buryn beldesip kórip pe ediń? – Árıne, Krpalekteı kúshti balýandy tatamıge alyp ur­ǵanda, biz de eshkimnen kem emespiz-aý degen oıdyń kelgeni ras. Kúni keshe ǵana Olımpıada chempıony bolǵan sportshyny jeńý, sóz joq, adamǵa qo­symsha kúsh beredi, ózińe degen senimdilikti eseleı túsedi eken. Jalpy, Krpalekpen birinshi ret kúrestim. Yńǵaıǵa keletin balýan eken... – Sportsúıer qaýym, seniń jankúıerleriń «Shynkeev bıyl «Qazaqstan barysyna» qatysa ma eken?», dep júr... – «Qazaqstan barysyn» utý – meniń basty armanym. Sáýir aıynda Qaraǵandy oblysy boıyn­sha osy jarysqa irikteý syny ótedi. Soǵan mindetti túrde qa­ty­sam. Aldymnan tosqaýyl qo­ıy­l­masa, men kúresten qash­qan emespin. – Qazirgi ýaqytta seniń jeke jattyqtyrýshyń kim? Jal­py, qaı mamannyń aqyl-keńesine kóbirek qulaq túre­siń? – Men álem chempıony Mak­sım Rakovtyń ákesi Sergeı Ra­kov jáne Talǵat Baısholaqov degen bilikti bapkerlerdiń qaramaǵynda jattyǵam. Jatty­ǵý zalynda, tatamı ústinde kóbine Sergeı Kapıtonovıchpen jumys isteımin. Tájirıbeli maman. Ol kisiden úırenerim kóp. Talǵat Saıranuly bolsa, psıhologııalyq turǵydan kóp kómek beredi. Men úshin adamdy jigerlendirýge kelgende bul bapkerge jetetin maman joq. – Sońyńnan shyqqan dúbir­di sezesiń be? El ishindegi ja­rys­tarda kimderdi báse­keles sanaısyń? – Bizdiń elde dzıýdo kúresi damyp keledi. Sońymyzdan ilesip kele jatqan talapty degen jastar barshylyq. My­saly, byltyr Qazaqstan chempıonatynyń fınalynda ózimmen kúresken Elaman Erǵalıev degen balýannyń bola­shaǵy zor dep oılaımyn. О́zimshe, meniń izimdi basar, isimdi jalǵastyrar jastyń biri sol bolar-aý dep topshylaımyn. – Áńgimeńe rahmet. Áńgimelesken Qaırat ÁBILDINOV, «Egemen Qazaqstan»