Qazaqstanda eńbek ótilin esepke alý júıesi tolyqtaı sıfrlyq formatqa kóship keledi. Eńbek jáne halyqty áleýmettik qorǵaý mınıstrliginiń málimetinshe, qaǵaz túrindegi eńbek kitapshalary birtindep óz mańyzyn joǵaltyp jatyr. Degenmen, keıbir azamattar úshin olar áli de qajet bolýy múmkin. Bul týraly Ortalyq kommýnıkasııalar qyzmetinde ótken brıfıngte vıse-mınıstr Bahtııar Jazyqpaev aıtty, dep habarlaıdy Egemen.kz.
Mınıstrlik ókiliniń sózinshe, qazirgi eńbek naryǵyna alǵash kelgen qyzmetkerlerdiń derekteri birden elektrondy formatta tirkeledi. Sonyń negizinde eńbek ótili saqtalyp, bolashaqta zeınetaqy men áleýmettik tólemderdi rásimdeýge múmkindik beredi.
«Qazirgi tańda qyzmetkerlerdiń eńbek qyzmeti sıfrlyq júıede júrgiziledi. Osy arqyly eńbek ótilin rastaý jáne áleýmettik qoldaý sharalaryn rásimdeý áldeqaıda jeńildedi», dedi Bahtııar Jazyqpaev.
Zeınetaqy tólemderinen 20% ustalynatyny ras pa?
Onyń aıtýynsha, zeınetaqy men járdemaqy taǵaıyndaý kezinde negizgi derekterdiń basym bóligi qazirdiń ózinde sıfrlandyrylǵan. Sondyqtan qaǵaz qujattarǵa degen qajettilik azaıyp keledi.
Sonymen birge, 1998 jylǵa deıingi eńbek ótiline qatysty keıbir derekter áli de arhıvterde saqtalyp otyr. Osy máseleni sheshý úshin memlekettik organdar e-arhıv júıesimen ıntegrasııa júrgizip jatyr.
«Biz e-arhıv júıesimen jumys istep jatyrmyz. Sonyń arqasynda azamattar zeınetaqy taǵaıyndaý kezinde eski eńbek kitapshalaryndaǵy málimetterdi ózderi dáleldeýdiń qajeti bolmaıdy. Qajetti aqparat arhıvterden avtomatty túrde alynady», dedi ol.
Endi azamattar zeınetaqy aktıvterin ınternet-platforma arqyly baqylaı alady
Osylaısha, elimizde eńbek ótilin esepke alý tolyq sıfrlyq júıege kóship keledi. Al qaǵaz eńbek kitapshalary tek ótken jyldardaǵy eńbek tájirıbesin rastaýǵa arnalǵan qosymsha qujat retinde ǵana saqtalady.